KINA PREMTON AUTOSTRADËN SHQIPËRI-MAQEDONI
E Mërkurë, 09.10.2014, 10:59am (GMT+1)
Dita e dytë e vizitës së kryeministrit Edi Rama në Kinë, është shoqëruar me një premtim nga shteti kinez për Shqipërinë: Bashkëpunim më të ngushtë mes palëve. Gjatë takimit me homologun e tij kinez Li Keqiang, kryeministri mori garancinë e Pekinit për të ndërtuar një autostradë që lidh Shqipërinë dhe Maqedoninë.
"Kina dhe Shqipëria do të punojë për të bërë përparime në projekte të mëdha, duke nxitur ndërtimin e autostradës që lidh Shqipërinë dhe Maqedoninë në mënyrë të veçantë", tha Li.
Li Keqiang vlerësoi miqësinë tradicionale mes Shqipërisë dhe Kinës dhe e cilësoi vizitën e homologut shqiptar si një mundësi për përmirësimin e shkëmbimeve të nivelit të lartë dhe për të promovuar bashkëpunimin në të gjitha fushat.
Më tej kryeministri kinez deklaroi se sektori i energjisë, bujqësisë dhe infrastrukturës do të jenë prioritetet e bashkëpunimit mes dy vendeve. Ai tha se Kina është e gatshme të importojë produktet bujqësore dhe minerare nga Shqipëria për të mbështetur ndërmarrjet kineze, si dhe angazhimin në zhvillimin e infrastrukturës në Shqipëri.
Nga ana tjetër kryeministri Rama tha se të dy vendet kanë gëzuar marrëdhënie të shëndosha, dhe shprehu gatishmërinë për të thelluar miqësinë tradicionale dhe zgjerimin e bashkëpunimit me Kinën. Ai përshëndeti investimet e sipërmarrësve të shumtë kinezë në Shqipëri, dhe premtoi lehtësimin e transaksioneve të tilla.
Energjia, nënshkruhet memorandumi i bashkëpunimit
Shqipëria dhe kompania shtetërore kineze kanë nënshkruar një memorandum bashkëpunimi për sektorin e energjisë.
Ministri i Energjetikës, Damian Gjiknuri, i cili po shoqëron kryeministrin Rama në Kinë, ka firmosur bashkëpunimin me kompaninë energjetike "Power China", së bashku me drejtorin ekzekutiv të saj. Kjo kompani zotëron rreth 50% të tregut botëror të hidroenergjisë. Për nënshkrimin e memorandumit, mësohet se është është punuar rreth gjashtë muaj.
Rama merr pjesë në Forumin Ekonomik Botëror
Ndërkohë gjatë ditës së dytë të vizitës së tij në Kinë, kryeministri Rama mori pjesë në sesionin mbi ekonominë me temë, "Suksesi i një ekonomie të re krijuese". Sesioni që u mbajt nga Forumi Ekonomik Botëror në Tianjin të Kinës lindore, kishte rreth 1900 pjesëmarrës nga 90 vende të ndryshme të botës.
Vetë kryeministri Rama, konfirmoi pjesëmarrjen e tij në këtë sesion, përmes një postimi në profilin e tij në Twitter. Kreu i qeverisë vlerësoi diskutimin e panelit të Forumit Ekonomik Botëror dhe bëri me dijë dy tematikat kryesore të tij, teknologjinë e re dhe arsimin.
"Paneli i parë i Forumit Ekonomik Botëror, një diskutim interesant mbi teknologjinë e re dhe arsimin për të gjithë", shkruan Rama në Twitter.
www.voal-online.ch
|