Nga e djathta: I.Hajdarmataj, V.Kona e M.Gecaj
1.
Një lexues i vëmendshëm, që nga marsi 2012 e deri tani, ka parë disa shkrime,
të publikuara në shtyp dhe në Internet, për librin publicistik-letrar,
"Dorela", me autor prof. Murat Gecaj. Ai u botua, kur kjo vogëlushe mbushte 9
vjet të jetës së saj dhe përmblidhte rrëfenja e skica të autorit-gjysh për
mbesën e saj. Përmbajtja kryesore e tyre ishte për të treguar e dëshmuar
domosdoshmërinë dhe përvojën e kujdesit të prindërve e gjyshërve ndaj të
vegjëlve, duke i udhëhequr e mësuar ata, sa më mirë për jetën. Siç dëshmohet
mirë edhe në atë botim, kjo gjë arrihet jo vetëm me fjalën e mençur e të urtë,
por edhe duke i shoqëruar ata në mjedise dhe veprimtari të ndryshme, jashtë
procesit mësimor-edukativ në shkollë.
Autorët e atyre shkrimeve, që i gjejmë në këtë libër modest të ditëve të
fundit, me vetëm 63 faqe, janë publicistë, studiues e shkrimtarë, me banim në
Shqipëri dhe jashtë saj. Secili në mënyrën e tij, ka shprehur mendime dhe është
ndalur në vlerat e atij botimi, i cili është ndër më të rrallët në letërsinë
tonë. Vogëlushja Dorelë, sivjet në mars, mbushi 10 vjet dhe, me këtë rast,
gjyshi i saj publikoi një shkrim. Kolegë, miq e dashamirë të tij dërguan
përshëndetje e mesazhe urimi, që ajo të rritet sa më e shëndetshme dhe e
zgjuar, që të jetë sa më e gëzuar dhe e lumtur në jetë. Pra, me ndjenjat e
dashurisë së madhe për mbesën e tij, por dhe për të nderuar e respektuar
kolegët e miqtë, që shkruan ose dërguan urimet e tyre, gjyshi Murat Gecaj i
mblodhi të gjitha ato shkrime e urime, me dëshirën që t'i botonte në një libër
të vogël. Dhe ja, kështu tani e kemi në dorë atë dhe po e shfletojmë, faqe pas
faqeje.
Kopertinat e librit të ri...
2.
Në pjesën e parë, edhe në këtë botim, me titullin "Qofsh e lumtur, mbesa
Dorelë!...", është shprehur shkrimtari i njohur Viron Kona, i cili e kishte
hartuar hyrjen e librit "Dorela". Ndër të tjera, aty lexojmë këto radhë
domethënëse:_"Si pa e kuptuar, "Dorela", me skicat dhe rrëfenjat, na vë në
mendime dhe na bën një ftesë të këndshme: -Merruni më shumë me ne, fëmijët; na
kushtoni më shumë vëmendje; dëgjoni mendimet dhe zërat tanë; na i plotësoni
dëshirat dhe ëndrrat, që kemi për jetën, të ardhmen. ..Pa mendoni pakëz: Çfarë
do të dëshironit të bënin, prindërit dhe gjyshërit tuaj për ju, kur ishit të
vegjël? Se edhe ju keni qenë dikur të vegjël, apo jo?"
Më pas vjen shkrimi im, me titullin: "Pak radhë për "Dorelën", por dhe
"Babushin" e saj". Ndër të tjera, aty kam nënvizuar se: "Vlerat e këtij libri,
ku unë isha recenzent, janë të përgjithëshme, por edhe të veçanta. Pra, në
tërësi, ai u nevojitet për lexim jo vetëm fëmijëve, por edhe mësuesve e
prindërve, gjyshërve dhe edukatoreve në kopshte".
Në shkrimet e Belantina Venarit (Elbasan), Fran Gjokës (Lezhë), Enkelejda
Kondit (Francë) dhe Sejdo Harkës (Tiranë), janë ravijëzuar vlera dhe arsye të
shumta nga përmbajtja pedagogjike e këtij libri, se përse lipset që të rriturit
t'i kushtojnë më tepër vëmendje, shoqërimit dhe edukimit të fëmijëve. Dhe kjo
gjë arrihet me një kujdes të vazhdueshëm për ta, duke mos e nënvlerësuar rolin
e punës e përvojës së më të rriturve. Me mjaft kujdes e ka analizuar
përmbajtjen e këtij libri edhe studiuesi Xheladin Mjeku, nga Prishtina. Në mbyllje
të shkrimit të tij, ai thekson: "Mund të konkludojmë se Murat Gecaj është jo
vetëm njohës i thellë i psikologjisë së fëmijëve, por edhe mjeshtër i shkrimit
letrar dhe ndërtimit të imagjinatës së fëmijës, që e bëjnë librin me vlera të
pakontestueshme artistike-letrare dhe edukative".
Në shkrimin e tij të gjatë dhe me përmbajtje të spikatur psikologjike e
pedagogjike, prof. Kolë Tahiri, me banim familjarisht në Bruksel të Belgjikës,
nënvizon e këshillon:
"I ftoj fëmijët që ta lexojnë "Dorelën", sepse aty do të gjejnë një shembull me
vlerë, një model të paraqitur artistikisht dhe të ilustruar me mjaft fotografi
e shembuj, që ia vlen për t'u lexuar dhe ndjekur në jetën e përditëshme. Ndërsa
të rriturve ua propozoj atë, si model të thjeshtë e praktik, lehtësisht të
përdorshëm për trajtimin psikologjik e pedagogjik të fëmijëve të tyre dhe
forcimin e lidhjeve të përzemërta ndërmjet brezave".
Si "shtesë" e kësaj pjese, pra nga recensiont e botuara për këtë libër, është
një mesazh i publicistit dhe shkrimtarit Fiqiri Shahinllari, me banim në
Aleksandria (Nju Jork). Ai shprehet: "Gjatë leximit, po mendoja se ky libër ka
vlera të lexohet dhe mësohet nëpër kopshte fëmijësh 5-6 vjeçarë. Por, mbase, të
futet edhe në orët edukative, nëse ka, në klasat e para dhe deri në ato të
katërta, të shkollave 9-vjeçare, në Shqipëri".
3.
Në pjesën e dytë të këtij "libërthi", janë botuar urimet, që kanë dërguar disa
veta, që e njohin, e kanë takuar Dorelën ose kanë lexuar për të, me rastin e
10-vjetorit të ditëlindjes së saj (11 mars 2013). Ato i ka paraprirë shkrimi i
"Babushit" të saj, prof. Murat Gecaj, që mban titullin: "Mbesa ime Dorelë,
mbushi 10 vjet ose: Në vend të një libri të dytë, shkruar për të". Pastaj
vijohet me vjershën-urim për Dorelën, që e ka thurur, pikërisht në këtë
përvjetor, poeti e shkrimtari i njohur, Përparim Hysi. Ai e thekson lumturinë e
gjyshërve të saj dhe nga zemra uron, që: "T'u sjellë veçse lumturi, në shkollë
e dalluar,/ unë si mik po sjell urimin: 100 vjet e gëzuar!"
Plot dashamirësi e fjalë të bukura janë edhe urimet e tjera, të dërguara për
vogëlushen Dorelë, nga: Fatmir Terziu (Londër), Diana Kapiti (Shkodër), Ermira
Babamusta (Nju Jork), Kadri Tarelli (Durrës), Lindita Titka-Pasholli (Tiranë),
Zef Osmani (Gjakovë-Kosovë) e të tjerë.
Pra, ky "libërth", me komente për librin publicistik-letrar "Dorela", që është
përgatitur nga prof. Murat Gecaj, na sjell përsëri në kujtesë vlerat e shumta
të tij: pedagogjike, psikologjike, familjare e shoqërore etj., duke theksuar
domosdoshmërinë e kujdesit të pandërprerë ndaj fëmijëve, si nga prindërit dhe
gjyshërit e tyre.
18 qershor, 2013
Comments (0)
Dërgoja shokut
Printo
