E shkruar para 36 vjetesh
ME SINQERITET
Poezi nga ZEQIR LUSHAJ
E Djelë, 05.04.2014, 08:56pm (GMT+1)
 Në sofër thyej bukën e misrit,
Pjekur aq mirë me saç e çerep,
Avulli i saj më sjell kënaqësi,
Si këngët e nënës kur isha në djep.
Mendoj me copën e bukës në dorë,
Po harrova ndonjëherë o misër,
Që trupin e rrita me ty,
Kam humbur diçka nga emri NJERI!
Puna më solli në Kryeqytet,
Në pallat buzë Lanës kam shtëpinë,
Mos më quani të ndarë nga fshati i largët,
Nga bjeshkët e mia ku ruajta bagëtinë.
Po të jetë nevoja prap e kapi krrabën,
Bagëtinë të ruaj, nuk më vjen zor,
Ndryshe mos më quani djalin tuaj,
Kam humbur shumë nga emri MALËSOR!
Kur të harroj ty, o fshat i largët,
Po të ndenja larg pse u bëra "qytetar",
I tepërt do jem edhe në qytet,
Kam humbur shumë dhe si SHQIPTAR !
./.
Tiranë, 1978
-Nga libri Hija e vendlindjes", faqe 61-62-
(Per VOAL,ch, nga NJ, USA, 4 Maj 2014)
ZEQIR LUSHAJ
|
Comments (0)
Dërgoja shokut
Printo
