VOAL - Online Zëri i Shqiptarëve - Tirana fiton superkupën, mund 1:0 Flamurtarin

Tirana ka fituar Superkupën e Shqipërisë, duke mundur 1-0 Flamurtarin në "Qemal Stafa". Bardheblutë e kanë nisur në mënyrën më të mirë sezonin e ri futbollistik, duke u hakmarrë edhe për finalen e Kupës ndaj skuadrës vlonjate.

Ka qenë pikërisht një vlonjat, Arbër Abilaliaj ai që ka ndëshkuar skuadrën e qytetit të lindjes. Sulmuesi i ri i Tiranës kërceu më lart se të tjerët pas një goditje këndi në minutën e 72-të dhe e dërgoi topin në rrjetë. Goli i parë për të me fanelën bardheblu, por edhe një nga më të rëndësishmit. Tirana fiton kështu trofeun e parë për këtë sezon, ndonëse në fushë ishte me shumë mungesa. Muka, Muzaka dhe Memelli nuk ishin të gatshëm për kampionët në fuqi, ndërkohë që në krahun tjetër Flamurtari dukej një skuadër e kompletuar. Sa i përket ndeshjes, të dyja skuadrat kanë luajtur si të barabarta edhe pse takimi u luajt në kryeqytet. Në pjesën e parë për t'u përmendur një rast i Abilaliajt në minutën e 9-të dhe një gjuajtje me kokë e Lilës në të 25-tën. Në të dytën, arbitri Janku tregoi se nuk ishte në lartësinë e situatës, duke mos dhënë një penallti të pastër për Flamurtarin, kur Dabulla pengoi në zonë Roshin. Pas kësaj finaleje, fundjavën e ardhshme do të nisë edhe sezoni i ri i Superligës.