VOAL - Online Zëri i Shqiptarëve - Usain Bolt legjendë e Atletikës, rekord botëror edhe në 200 m

Usain Bolt ka çuditur sërish botën, duke fituar medaljen e artë në garën e 200 metrave dhe duke vendosur një rekord të ri. Në kampionatin botëror të atletikës, xhamajkani tregoi sërish se nuk njeh rivalë, duke i përshkruar 200 metrat në kohën 19 sekonda e 19 të qindtat. Një rekord i ri botëror që e ul me 11 të qindtat atë ekzistuesin, por dhe një tjetër medalje ari për të. Bolt konfirmohet kështu si mbreti i atletikës, por edhe si njeriu më i shpejtë i planetit Tokë. Xhamajkani ishte i papërmbajtshëm edhe këtë herë, duke u nisur mirë dhe duke u shkëputur që në 50 metrat e para. Në fund, gjestet e zakonshme që tregojnë pasionin për muzikën rep. I dyti u rendit atleti nga Panamaja Alonso Eduard me kohën 19"81, ndërsa pas tij amerikani Uollas Spirmon me 19"85.

Gara e radhës për Usain Bolt në këtë botëror është ajo e stafetës 4 herë 100 metra, ku ai dhe kuarteti xhamajkan shihen si favoritë. Ditën e premte ai do të mbushë 23 vjeç dhe medalja e artë në 200 metra ishte dhurata më e mirë. Ky ishte rekordi i dytë për atletin nga Xhamajka, pas atij prej 9 sekondash e 58 të qindtat të vendosur ditën e hënë në garën e 100 metrave. (balkanweb)