BRAZILI MPOSHTI BINDSHËM SPANJËN
E Hënë, 07.01.2013, 06:04am (GMT+1)
Rio de Janeiro Futbollistët e Brazilit fituan për herë të tretë Kupën e
Konfederatave, pasi në ndeshjen finale i shkaktuan një disfatë të thellë
Spanjës me rezultatin 3:0. Brazili erdhi në epërsi që në minutën e 2-të të
takimit, pas një rrëmuje që u krijua para portës së Casillasit. Fred u gjet më
së mirë në një rrëmujë të krijuar para portës së spanjollëve dhe i shtrirë për
toke nga dy-tre metra largësi ia doli të plasojë topin në rrjetin e
spanjollëve.
Brazili zbatoi një lojë shumë agresive nëpër tërë fushën dhe arriti
t'i ndalë sulmet e futbollistëve të Spanjës, kurse në sulm pati edhe disa raste
të mira shënimi. Me kalimin e kohës futbollistët spanjollë arritën të lirohen
deri diku nga presioni dhe në minutën e 41-të pati rastin më të mirë. Në një
kundërsulm të shpejt me tri katër pasime topi erdhi deri të Pedro, por kur ky e
dërgoi topin në rrjet dhe të gjithë menduan se topi do të përfundojë në rrjet,
mbiu David Luiz dhe e devijoi topin në korne.
Nuk vonoi shumë dhe vetëm katër minuta më vonë (44) Brazili e dyfishoi
epërsinë me anë të talentit të madh Neymar, i cili pasi mori një pasim të mirë,
nga afro 15 metra anash në të majtë, me një goditje të fuqishme nga rreth 15
metra e dërgoi topin prapa shpinës së Iker Casillasit. Sipas përllogaritjeve
të bëra nga mediat spanjolle (Marca), shpejtësia e goditjes së topit nga ana e
Neymar me rastin e shënimit të këtij goli ishte 110 kilometra në orë.
Me të nisur pjesa e dytë, në minutën e 47-të 78 mijë shukues në stadiumin
Maracana sërish në trans. Golin e tretë sërish e shënoi qendërsulmuesi
Fred, i cili erdhi në posedim të topit në anën e majtë të fushës dhe më një
goditje të plasuar për toke mposhti Casillasin.
Në minutën e 54-të, penallti për Spanjën. Jesus Navas, i cili e zëvendësoi
Arbeloan e dobët, depërtoi në zonën e rreptësisë së Brazilit, kurse Marcelo
"ra" në një fintë të tij dhe e rrëzoi. Mirëpo, Sergio Ramos nuk e shfrytëzoi
rastin më të mirë dhe huqi për disa centimetra shtyllën vertikale të portës së
Julio Cesar.
Në minutën e 68-të, Gerard Pique startoi afër zonës së rreptësisë ndaj
Neymarit , kurse arbitri holandez këtë start e kualifikoi si të rëndë dhe e
ndëshkoi me karton të kuq. Por, nga gjuajtja e lirë Neymar nuk ishte aq i saktë
sikur kundër Italisë.
Ndonëse me një lojtar më pak në fushë, së pari Pedro e më vonë edhe
zëvendësuesi David Villa patën raste të mira shënimi, por portieri brazilian
reagoi shkëlqyeshëm dhe e pamundësoi zbutjen e disfatës së thellë të Spanjës
www.voal-online.ch
|