VOAL - Online Zëri i Shqiptarëve - NË SUNDERN TË GJERMANISË BËHET ZBULIMI I SHTATORES SË NËNË TEREZËS

28.11.2011 ã€€

Në qendër të qytetit Sundern në landin e Renanisë Veriore-Vestfalisë në një ceremoni festive të shtunën (26.11.), para kishës katolike St. Johannes, është bërë zbulimi i shtatores së nobelistes Nënë Tereza.

"Ne sot po bëjmë zbulimin e një skulpture të bronztë të Nënë Terezës. Kjo shtatore me siguri dikënd e befason, sepse kjo dhuratë vjen nga marrëdhëniet me komunitetin shqiptar, që jeton dhe punon në Sundern. Secili qytetar e njeh hijen e lehtë të Nënes Terezë. Unë besoj se vetëm një pakicë e di, se Nëna Terezë ka origjinë shqiptare. Të 200 shqiptarët, që jetojnë sot në Sundern , atdheut të tyre të dytë, Sundernit, sot po i japin një dhuratë të mrekullueshme, shtatoren e Nënës Terezë", u shpreh ndër të tjera kryebashkiaku i Sundernit, Detlef Lins. Në mesin e të pranishmëve ishin edhe konsulli i Republikës së Kosovës në Frankfurt mbi Majn, Astrit Zemaj, zëvendësministri për Kulturë, Rini dhe Sport në qeverinë e Kosovës, Hajdin Abazi, si dhe kryebashkiaku i komunës së Malishevës, Isni Kilaj.

Zbulimin e shtatores së punuar nga skulptorja Marlies Hof e bënë kryebashkiaku i Sundernit, Detlef Lins dhe Hajdin Abazi, zëvendësminisër për Kulturë, Rini dhe Sport i Kosovës. Zëvendësministri Hajdin Abazi, duke folur për humanisten shqiptare Nëna Terezë, tha se "ajo ishte e vogël me trup, mirëpo në shtatin e saj të vogël kishte një shpirt të madh... Kjo shtatore e Nënës Terezë me modesti madhështore do të na kujtojë nevojën e pashueshme midis njerëzve për dashuri, respekt të ndërsjellë, për bashkëjetesë dhe për ndihmë ndaj njëri tjetrit", theksoi z. Abazi.

Ndërkaq Astrit Zemaj, konsul i Kosovës në Frankfurt, tha se: "Nëna Terezë është nënë e gjithë botës. Ne jemi shumë krenarë që si komb i vogël botës ia kemi dhënë një njeri të madh!"

Në pamundësi për të marrë pjesë në këtë aktivitet Valter Ibrahimi, ambasador i Shqipërisë në Berlin, të pranishëmve u kishte dërguar një telegram urimi, ku ndër të tjera shkruante: "Iniciativa juaj për vendosjen e shtatores së Nënë Terezës në qendër të qytetit Sundern është një iniciativë, që krenon çdo shqiptar, që jeton në Gjermani dhe më gjerë."

Pas zbulimit të shtatores, kryetari i komunës së Sundernit, Detlef Lins, ka shtruar një drekë pune për mysafirët kosovarë dhe gjermanë. Me atë rast Fadil Bytyqi, kryetar i shoqatës gjermano-kosovare, kryebashkiakut i dorëzoi certifikatën për shtatoren e Nënës Terezë.

Autor: Halil Rrustemaj

Redaktoi: Esat Ahmeti

(http://www.dwelle.de)