HUMBJE E RËNDË NË FAMILJEN E DR. SELAHEDIN VELAJ Nga FRANK SHKRELI
E Shtunë, 10.16.2010, 10:07pm (GMT+1)
Në foto: Drini Velaj 
Një lajm i zi dhe një pikëllim i thellë u përhap në radhët e miqve dhe të dashamirësve të familjes së patriotit, anti-komunistit dhe mikut Dr. Selahedin Velaj. Djali i tij, Dr. Drini Velaj ndërroi jetë në një aksident tragjik në moshën 42-vjeçare. Të gjithe pyesim se si vdekja e pamëshirshme e mori këtë lule të bukur nga kjo jetë, atëherë kur një gjë e tillë nuk pritej aspak. Kësaj rradhe fati u tregua krejtësisht i pamëshirshëm. Jeta e tij qe fatkeqësisht tepër e shkurtë e u shua tepër shpejt. Zbrazëtia që ka lënë pas Drini në familjen Velaj nuk mund të plotësohet me asgjë. Dr. Selahedin Velaj dhe familja e tij ishin pjesë e pandarë e komunitetit; konsiderohej si e jona, pasi kjo familje nga jugu i Shqipërisë ishte e pajisur me cilësi të rralla kombëtare dhe virtyte të larta njerëzore. Dr. Selahedin Velaj dhe familja e tij ndau me të gjithë ne --nga të gjitha trojet shqiptare -- nga Kosova e nga Malësia, të këqijat dhe vuajtjet e mërgimit. Karakteri i kësaj familjeje tërhiqte çdonjenin, prandaj humbjen e Drinit e qan natyrisht e gjithë familja, e qan babai i moshuar Selahedini, e qajnë e shoqja dhe fëmijët, por në të njëjtën kohë e vajtojnë miqtë e familjes dhe e qan i gjithë komuniteti shqiptaro-amerikan.
Fjalët në këto raste kaq të dhimshme nuk dalin lehtë. Por Familjes Velaj dhe mikut të dashur Dr. Selahedin Velajt, me të cilin shtigjet e vështira të historisë sonë të hidhur na bënë të njihemi në Amerikën e largët -- duke marrë pjesë në zinë që e goditi kaq rëndë -- i paraqes atij dhe farefisit mbarë ngushëllimet dhe ndjenjat e mia më të forta të përdhimtimit dhe ndjenjat ma të thella miqësore. Shpirti i Drinit pushoftë në paqe dhe ju Zoti u dhashtë kivet.
FRANK SHKRELI
|