Avokatja e Veronika Larios është ish këshilltare e familjes së Eluanës
E Martë, 05.05.2009, 02:25pm (GMT+1)
ATSH-AFP/ - Bashkëshortja e Silvio Berluskonit, Veronika Lario, zgjodhi për ta përfaqësuar gjatë divorcit një avokate që ka mbrojtur të drejtën për të vdekur të Eluanës, një rast i kritikuar ashpër nga kryeministri italian, njoftojnë burime pranë kabinetit të avokates. "Konfirmojmë" se Maria Cristina Morelli është zgjedhur nga Veronica Lario për ta mbrojtur gjatë procedurës së divorcit, i deklaroi AFP-së sekretariati i kabinetit të saj në Milano. Avokatja ka përfaqësuar veçanërisht interesat e familjes së Eluana Englaros në fillim të betejës së gjatë gjyqësore që ajo zhvilloi për të njohur të drejtën për të vdekur të gruas së re, e cila vdiq më 9 shkurt. "Ajo përfaqësoi familjen Englaro në periudhën 1999-2003 përpara dy gjykatave të shkallës së parë dhe një gjykate apeli", i bëri të ditur AFP-së avokati aktual i familjes, Vittorio Angiolini. Vendimi i Gjykatës së kasacionit që konfirmoi në dhjetor të vitit 2008 të drejtën për të ndërprerë ushqimin e gruas së re pas 17 vjet qëndrimi në koma është kritikuar ashpër nga Kisha Katolike dhe nga Silvio Berluskoni. Kryetari i qeverisë u përpoq deri në fund ta pengonte zbatimin e saj, duke kërkuar me urgjencë votimin e një projektligji që i detyronte mjekët të rifillonin ushqimin e saj. Silvio Berluskoni zgjodhi si avokat motrën e avokatit të tij Niccolo Ghedini, specialist i të drejtës penale gjithashtu deputet i partisë në pushtet, njoftoi agjencia Ansa. Ippolita Ghedini është specialiste e të drejtës civile. Aspekti financiar i divorcit i intereson mjaft shtypit që i kushton artikuj të gjatë për shkak të pasurisë së Kavalierit, e vlerësuar në rreth 6 miliardë euro nga revista amerikane "Forbes". Ky divorc nuk pritet të paraqesë probleme për bashkëshortët të cilët janë martuar duke përfshirë ndarjen e pronave në kontratën martesore. Tërheqja e Veronikës nga trashëgimia do të ketë si pasojë rritjen e pjesës së trashëgimisë së pesë fëmijëve të Silvio Berluskonit, dy të mëdhenjtë nga martesa e tij e parë dhe tre të tjerët me nënë Veronikën, nga 50 për qind në 66,66 për qind. Sipas të përditshmes ekonomike "Il Sole 24 Ore", edhe pjesa që i takon Kavalierit rritet nga 25 për qind në 33,33 për qind
|