Publikuar: Sot, më 24 maj 2011

Prishtinë, 24 maj - Këshilli për Mbrojtjen e të drejtave të luftëtarëve të ish Ushtrisë Çlirimtare, filloi dje pasdite një grevë urie përballë qeverisë së Kosovës me kërkesën për përmirësimin e pozitës së veteranëve të luftës. Por, më shumë sesa kërkesat ekonomike, greva ka për qëllim të tërheqë vërejtjen në siç thuhet, trajtimin jo të mirë të ish-kryengritësve nga ana e institucioneve vendase e ndërkombëtare. Po ashtu grevistët janë shprehur kundër arrestimeve që EULEX-i po u bën bashkëluftëtarëve të tyre, ndërsa nuk arrestohen kriminelët serbë, të cilët kanë bërë krime dhe kanë shkatërruar vendin tonë. Kryetari i kësaj organizate, Xhevdet Qeriqi ka deklaruar se këtë greve më shumë po e bëjnë për arsye morale, duke mbrojtur vlerat e ish luftëtarëve të UÇK-së dhe se nuk do ta përfundojnë derisa të miratohet Ligji për vlerat e luftës. "Ne për çështje morale do të hymë dhe do të kërkojmë që ligji për vlerat e luftës përfundimisht të miratohet nga Parlamenti i Kosovës, në të kundërtën nuk do të dalim nga greva, nëse është nevoja edhe një ose dy muaj do të vazhdojmë dhe nuk e kemi ndërmend të largohemi", ka thënë Qeriqi. Ndërsa lidhur me deklaratën e Organizatës së Veteranëve të Luftës së UÇK-së, të cilët kanë njoftuar se nuk e mbështesin grevën, Qeriqi ka thënë se ata më shumë janë avokat të qeverisë, sesa që mbrojnë të drejtat e veteranëve.

(http://www.koha.net)

Rating (Votes: )

Comments (0)

Dërgoja shokut

Printo

---