Prishtinë, 1 tetor, Autoritetet gjermane kanë thënë të premten se Agim Zogaj ishte dëshmitar i mbrojtur edhe në Gjermani.

Një zyrtar federal gjerman i ka thënë "Kohës Ditore" në kushte anonimiteti se personi me emrin Agim Zogaj, i cili në Kosovë ishte dëshmitar i mbrojtur dhe i koduar me shkronjën "X", ka qenë edhe atje në programin e mbrojtjes së dëshmitarëve.

"Ai ishte në programin e mbrojtjes së dëshmitarëve, por kjo nuk do të thotë se ai është 24 orë nën mbrojtje", ka thënë ky gjerman në kushte anonimiteti.

Sipas tij, edhe natën e vdekjes dëshmitari Agim Zogaj e kishte shfrytëzuar një moment të shëtitjes dhe kishte shkuar në mal, ku, sipas tij, ka bërë vetëvrasje. Ky zyrtar nuk ka dashur të japë më shumë detaje.

Të enjten Policia gjermane bëri të ditur se sipas obduksionit në trupin e këtij dëshmitari, që nuk dihet ende pse ndodhej në Gjermani, se ai ishte vetëvrarë. Sipas një zëdhënësi të Policisë së atjeshme, Agim Zogaj i kishte treguar vëllait të tij se do ta vriste veten.

"Ne e kemi marrë informatën dhe menjëherë kemi dalë në kërkim të tij. Kërkimi ka zgjatur disa orë, por në fund e kemi gjetur rreth orës 23:50 në parkun e qytetit Duisburg. Tashmë ishte i pajetë", ka thënë zëdhënësi Ramon van der Maat.

E katër ditë pas vdekjes së këtij dëshmitari EULEX-i ka shprehur keqardhje për ngjarjen dhe u ka shprehur ngushëllime familjarëve të tij. Zëdhënësi i EULEX-it, Nicholas Hawton, ka thënë se rrethanat e vdekjes së tij janë duke u hetuar nga autoritetet gjermane për të shtuar se misioni evropian ka besim në përfundimet që do t'i nxjerrin ata.

"Siç e dini, personi ishte dëshmitar në një rast në Kosovë. Mbrojtja e dëshmitarëve dhe siguria e tyre janë çështje tejet të ndjeshme, për atë ne nuk mund të konfirmojmë apo mohojmë informata që lidhen me detajet e operacioneve. Shpresojmë që kjo të respektohet nga të gjithë", ka thënë Hawton.

Por a ka pasur siguri të mjaftueshme Agim Zogaj? Një prokuror kosovar ka thënë se në asnjë rast nuk do të duhej të ndodhte vdekja e dëshmitarit kyç. Sipas tij, siguria do të duhej të ishte në atë nivel saqë edhe ushqimi e pijet do të duhej të kontrolloheshin para se t'i konsumonte Agim Zogaj.

"Gjithkund në botë dëshmitarët mbrohen me çdo çmim. Nëse ky dëshmitar nuk do të merrej në pyetje edhe nga avokatët mbrojtës, ndërsa dëshmia e marrë nga prokurori, që në këtë rast është bërë pa praninë e avokatëve, do të shpallej si provë e papranueshme nga gjykata, atëherë procesi do të dështonte", ka thënë ky prokuror i Prokurorisë Speciale në kushte anonimiteti.

Një dëshmitar tjetër në Kosovë po kaq i rëndësishëm sa Agim Zogaj konsiderohet Nazim Bllaca. Që nga fillimi i këtij viti ai nuk është as në paraburgim e as në arrest shtëpiak. Por, për shkak të rëndësisë që ka për një proces të ardhshëm gjyqësor në të cilin dyshohet edhe deputeti Azem Syla, ai vazhdon të ruhet nga Policia e EULEX-it në shtëpinë e tij në Ribar të Madh të Lypjanit.

(http://www.koha.net)

Rating (Votes: )

Comments (0)

Dërgoja shokut

Printo

---