Voal-online - Janë të paktë ata njerëz që grija e flokëve u jep sharm dhe ua shton ngasjen, të tipit Richard Gere apo George Clooney. E cili nuk është trishtuar kur ka dalluar për herë të parë një fije floku të bardhë, nuk po themi se një tip si Victoria Beckham do të kishte plasur të qari po t'i thuhej se nuk do të kishte bojë për të fshehur thinjat e flokëve. Nuk po përmendim as milionat e miliardat që shpenzohen sot në botë në industrinë e bojrave të flokëve nga gra e burra pa dallim gjinie. Të paktën duke i ngjyrosur flokët e ndal pak efektin e ikjes së kohës.

Do të përbënte dramë lajmi sikur industria e bojrave të flokëve do ta ndalte prodhimin e bojrave, ndërsa duhet të shkaktojë lajmi i fundit nga laboratoret e L'Oreal, sipas të cilit kumtohet se studiuesit francezë të kompanisë kozmetike kanë identifikuar ekstraktin e një bime, që e mbajnë në sekret të plotë, e cila e ruan ngjyrën e flokëve dhe L'Oreal pritet që ta mbajë premtimin dhe në vitin 2015 ta hedhë në treg produktin në fjalë dhe atëherë "lamtumirë thinja dhe trishtim prej flokëve të bardhë".

Mosha mesatare e fillimit të flokëve gri është rreth 30 vjet. Sipas Bruno Bernard, kreut që drejton kërkimet, është arritur ndalja e thinjes së flokëve duke riaktivizuar qeliza të melaninës që i kanë mbijetuar plakjes. Zbardhja e flokëve u heq flokëve ngjyrën origjinale me kalimin e viteve dhe humbja e ngjyrës origjinale lidhet me melaninën.

Sipas hipotezave që bëjnë specialistët e fushës pas këtij lajmi, ku po hamendësohet për frutin magjik që do t'iu shpallë luftë thinjave, ka të ngjarë që ky frut të jetë përshembull diçka e tipit të shegës, pra një frut shumë i ngjyrosur.

Sipas studimit, L'Oreal ka monitoruar 13 000 vullnetarë të moshës midis 35 dhe 60 vjeç për tetë vjet rresht, gjatë së cilës shumë pjesëmarrës ose kanë humbur flokët ose flokët e e tyre janë bërë gri, por pastaj në sajë të ndërhyrjes të frutit misterioz ka ndodhur mrekullia.

Bernard vë në dukje se "do të ishte ideale që përpara se të fillonte zbardhja e flokëve të fillohej e të merrej fruti magjik, ndërkohë që shton se mund të funksionojë me të parën herë kur procesi i zbardhjes është i kahershëm». Gjatë këtyre kërkimeve janë zbuluar dy gene, njëri prej të cilëve lidhet me zbardhjen e parakohëshme, kur nis që në moshën 20 vjeçare. Po ashtu edhe sa i përket humbjes të flokëve, në rastin e « tullacëve », edhe kjo lidhet me një komponent gjenetik, dhe nëse përcaktohet saktësisht, shkohet edhe në eleminimin e këtij problemi. Lajmi që vjen nga L'Oreal është lumturues./Elida Buçpapaj