ME MJEGULL VITET MA MBULUAN FYTYRËN TËNDE, ZËRIN TËND Nga ALEKSANDËR SERGEJEVIÇ PUSHKIN (1799-1837)
E Enjte, 10.17.2013, 09:31am (GMT+1)
***
Ti mos më pyet, pse kaq i menduar në mes dëfrimesh unë rri gjithnjë, përse vështroj përqark i dëshpëruar, përse s'më josh as ëndr' e jetës më:
ti mos më pyet, pse porsi i huaj, qëndroj, kur dashuria po më grish edhe të dashur më asnjë s'quaj,- kush desh një herë, s'digjet më sërish.
Kush qe i lumtur, prap nuk lumtërohet se vesh një çast për ne gëzimi ndrin, pastaj me tis të mallit na mbulohet dhe shpirtin breng' e thellë na e nxin. --
A. P. KERNËS
Kujtoj me mall një çast gëzimi përpara sysh m'u shfaqe ti, si vezullim i një vegimi si ëngjëll plot me bukuri.
N'andralla jete zhurmëkote, në dhembje brengash e mërzi më grishte larg fytyra jote dhe zëri yt plot ëmbëlsi.
Nga shqot' e kohërave që shkuan kështjell'e ëndrrave m'u shëmb me mjegull vitet ma mbuluan fytyrën tënde, zërin tënd.
Ç'i ngrysa ditët gjith me brengë i zymtë dhe në shkretëti pa perëndi, pa shpres'e këngë pa lotë, jet'e dashuri.
Në shpirt më shkrep agimi, dhe ja, sërishmi m'u shfaqe ti, si vezullim i një vegimi, si ëngjëll plot me bukuri.
Dhe rreh me gaz kjo zemra ime sepse iu kthyen përsëri dhe perëndi dhe frymëzime dhe lot jetë e dashuri.
--
RRUGË DIMËRORE
Në mes mjegullash të nxira hëna zhduket, hëna bredh. Mbi të trishtëmet rrafshira trishtëm dritën ajo derdh.
Udhës shkretë dimërore rend kjo trojka gjithnjë. Zile e kalit monotone mezi ndihet nëpër të.
Seç më kap një mall rinie karrocieri kur këndon, herë gas çapkënërie herë mall ai më zgjon.
S'shoh as zjarr e as kasolle vetëm borë si pambuk. Dhe përtej shtyllat rrugore duken, zhduken tek e tuk.
Ah, ç'mërzitje... nesër, Ninë, tek e shtrenjta do të vi. Pranë zjarrit kur të rrimë të të shoh me mall në sy.
Dhe akrepi i sahatit do vij' rrotull me qetësi E mërzitshmja mesnatë s'do na ndajë përsëri.
Mërzi udhës dimërore karrocieri zu dremit Zile e kalit monotone hënë e mjegullt që ndrit.
***
Pranverë, o kohëz dashurie, ç'më mbush plot me pikëllim. Sa mall sërish ti po më bie në shpirtin tim, në gjakun tim.
Për mua gazi është i huaj... çdo ngazëllim e çdo shkëlqim më sjell mërzi, më bën të vuaj.
Oh, nëmëni shqotën, suferinën dhe të pafundmen natë dimri.
***
Pse, moj jetë je dhuratë që të bie rasti kot? Pse të dha i fshehti fat një ndëshkim me tmerr në botë?
Ç'është ai pushtet i nxirë, që prej hiçit më ka thirë, që në shpirt më dha mundime dhe dyshim në mendjen time?
Pa një dritë e një qëllim, më rreh zemra në shkreti. Më mbush plot me pikëllim jeta gjith monotoni.
--
LULJA
Një lulëz mes një libri gjeta Të tharë edhe pa kundërmim Dhe për një çast i shtangur mbeta E humba thellë n'ëndërrim
Kur lulëzoi? Ç'pranverë thua? Kush e këputi edhe ku? Një dorë e njohur a e huaj? Dhe pse e vuri vallë këtu?
A për kujtim të një takimi? Apo për ndarjen plot trishtim? A për një endje pikëllimi Në heshtje fushash pa mbarim?
Ai, ajo, jetojnë vallë? Ku thua janë, ku bredhin ku? Apo mos ndoshta janë tharë Si dhe kjo lulëze këtu?
--
TI DHE JU
Të zbraztën "ju" ajo me "ti", Në kuvendim e ngatërroi, Dhe ëndërra plot lumturi, Në shpirt të ndezur seç më zgjoi.
I heshtur para saj qëndroj, Vështrimn' e dhembshur pa ja ndarë; E shtrenjtë jeni,- i shqiptoj,- Të dua! - shpirti flet me zjarr.
--
KALORËSI I VRARË
Në pyjet e largëta mbrëmja po ikën. Të fundmet shkëlqime të saj u veniten, Lugina e thellë ka heshtur; Zhurmon midis mjegullës lumi me valë.
mes reve që enden në qiell ngadalë. Ndrin hënëz e artë pareshtur.
Koracë e çeliktë dhe heshtë e coptuar Të shtrira po prehen te kodr'e vetmuar, Mburoja prej ndryshkut po nxin, Mamuzet të shkreta në myshk kanë mbetur
Dhe s'tunden nga vendi; dhe hënëz e mekur Mbi trup të përgjakur po ndrin.
Rreth kodrës vërtitet besniku dori, diçka vezullon thellë syve të tij, Me kryet e unjur kalon; Luginën po rreh me patkonj gjithë zjarr, koracën vështron edhe krejt vetmitar Po dridhet, së thelli gulçon.
Nxiton nëpër terr vetmitari dori, Me shpresë e me frikë e më drojtje në gji, Patkonjtë i brengosur rreh shpejt; Po ngjitet me duf në kodrinë e vështron E nxiton... e çeliku në terr tingëllon, Ndënë këmbën e lodhur të vet.
Afrohet te trup'i kalorsit të shkretë, Mundohet ta çojë, po kocka kërcet Edhe kafka përplaset për tokë... Së thelli i gjori dori hingëlliti Përqark n'errësirë vështrimin vërtiti Dhe heshtaz pastaj uli kokën.
Shtegtari që larg nëpër terr po kalon, mes heshtjes të ngjan se mbi kocka po shkon... Po ja dita zbardh përsëri, Koraca dhe heshta e shkretë po ndrin. Kalorsi rri shtrirë e s'lëviz mbi kodrinë. Doriu veç endet rreth tij.
--
I BURGOSURI
Lëngoj pas kafazit të burgut të zi. Një shkabëz robinjë përballë më rri; E ngrysur vështrimin ndër qiej vërvit, Tund krahët, dhe gjellën e gjaktë skërmit,
E shqyen, e flak, dhe më sheh me trishtim, Sikur kemi bashkë të njëjtin mendim. Më grish me vështrime dhe zjen e këlthet, "të nisemi" - thotë - "ku qjelli thërret"
Ne jemi dy zogj, pa liri s'rrojmë dot! mbi male, vëlla, të vërsulemi tok, Mbi detet e kaltër, të çiltër si lot, Ku era... dhe unë baresim ngamot!..."
--
DEMONI
Në ditët kur së pari nisa Të gjerën jetë ta kuptoja, Kur shihja vashëzat e lisat, Bilbilin natën kur dëgjoja,
Kur zulma, malli dhe liria, Dhe frymëzimi, poezia Si zjarr e flakë e patreguar, Në shpirt më zjejnë pa pushuar,
Kur brenga dhe mundim'i heshtur, Më zuri vend këtu në gji, Më vinte plot inat pareshtur, Këtu në zemër, një gjeni;
Gjithnjë më sillte shqetësim Çdo qeshje e tij e çdo vështrim. Te fjalë e tijë plot me vrer Dëgjoja të pafundmin ferr.
Ai me shpifje, pa pushim, Çdo gjë të shtrenjtë e mbulonte; Të dlirin, t'ëmblin ëndërrim Dhe frymëzimin e përçmonte;
S'besonte dashuri, liri, Jetën ai gjithnjë e përqeshte; Mbi dhé, për asnjë bukuri, Të thurte lavd ai nuk deshte.
--
MËNGJEZ DIMRI
Sa ditë e bukur! Diell e borë! Dhe ti, mikeshëz engjëllore, Ende bën gjumin ledhatar. Oh, zgjohu, ëmbël çil qepallat, Aurorës dil e shfaqju ballas, Shkëndrit mbi të si yll polar!
A të kujtohet moti mbrëmë? Buçiste shqota gjithë gjëmë dhe errësirë qe ngado, si njollëz hënëza zverdhonte Mes reve sterrë e të trishtonte po sot, pa dil në xham e shiko:
Në të pafundmen kaltërsirë, Qilimin madhështor ka shtrirë Dëbora, që prej diellit ndrin, Veç pylli nxin, po thellë prej tij Blerojnë bredhat e përbri, Nën akull, lumi vetëtin.
Me një shkëlqim prej qelibari Feks tërë dhoma e te zjarri Lodrojnë flakët gjithë gaz; Ti ndihesh ngrohtë aty në shtrat, Po shih këtu: doriun at Ta mbreh në slitë këtë ças?
E të rrëshqasim nëpër borë, Kësaj hareje mëngjezore, Mikeshë e shtrenjtë, me revane Të rendim fushës mbetur shkretë Dhe pyjeve, gjer dje plot fletë, Dhe bregut, që në shpirt e kam!
--
AKUILONI
Perse, o i rrepti Akuilon, Kallamet fort përkul kur fryn? Pse retë kaq me duf i shtyn? Prej horizontit ç'i dëbon?
Dikur, shtëllunga resh të nxira Mbulonin qjellin pa mbarim, Dikur, plot hir, me lartësira Lëkundej lisi pa pushim...
Po ti u ngrite dhe gjëmove, Me duf, me vrull e me lavdi - Nga qjelli retë i dëbove, Rrëzove lisin gjeth-flori.
S'ka gjë, tani le të ndriçoje Fytyrë e djellit plot me gaz, Me retë flladi të lodrojë Dhe me kallamet në çdo ças.
Përktheu: JORGO BLLACI
|