Solana: Uashingtoni dhe Brukseli ia dhanë një tronditje elektrike Bosnjes
E Mërkurë, 05.20.2009, 04:23pm (GMT+1)
Kryediplomati i BE-së, Javier Solana e cilësoi sot si "tronditje elektrike" mesazhin që u transmetoi zëvendëspresidenti amerikan, Joe Biden liderëve boshnjakë për t'i nxitur të zhbllokonin reformat dhe të hiqnin dorë nga retorika nacionaliste. "Duke folur për vizitën e djeshme, do ta cilësoja ... një lloj tronditjeje elektrike", i deklaroi Solana shtypit në Sarajevë, një ditë pas vizitës së Biden në Bosnjë, në etapën e parë të një turneu treditor në Ballkan. Solana u bashkua me Biden gjatë vizitës së tij në Sarajevë. "Ne transmetuam një mesazh shumë të qartë lidhur me çfarë duhet bërë për të çuar vendin përpara në drejtim të Bashkimit Evropian", shtoi Solana. "Besoj se së bashku me drejtuesit e këtij vendi (...), ne do të jemi në gjendje të ecim përparea dhe të dalim nga ky bllokim", deklaroi ai. Duke marrë fjalën përpara parlamentit boshnjak, Biden denoncoi retorikën nacionaliste të liderëve të komuniteteve kryesore, mysliman, serb dhe kroat dhe i ftoi të zgjidhnin rrugën e integrimit në BE dhe NATO, duke u vënë në dukje tmerret e luftës ndërkomunitare 1992-95. Biden dhe Solana u takuan gjithashtu me liderët e tre komuniteteve. /ATSH-AFP/
www.voal-online.ch
|