I ftuar nga presidenti shqiptar Bamir Topi, të enjten mbërrin për një vizitë dy ditore në Tiranë presidenti turk Abdulla Gyl.
Vizita e zotit Gyl në Shqipëri është e katërta e një presidenti turk që nga viti 1993, kohë kur i ndjeri Turgut Ozal u bë presidenti i parë turk që vizitonte vendin ballkanik që sapo kishte lënë pas diktaturën komuniste dhe kishte nisur rrugën e transformimeve demokratike dhe ekonomisë së tregut. Që nga ajo kohë të gjithë presidentët e të dy vendeve kanë shkëmbyer vizita intensive në Ankara dhe Tiranë.
Vizita e zotit Gyl, shihet si një konfirmim i marrëdhënieve shumë të mira që ekzistojnë prej kohësh midis Shqipërisë dhe Turqisë. Ato cilësohen të tilla në planin politik, ekonomik, ushtarak, arsimor dhe kulturor.
Turqia është një partner i rëndësishëm i Shqipërisë veçanërisht në fushën ekonomike. Kapitali turk zë vendin e tretë përsa i përket investimeve të huaja në Shqipëri, si dhe vëllimit të eksport-importit.
Prej vitesh biznesi turk është i pranishëm në Shqipëri me firma të tilla si Albtelekom, Eagle Mobile, BKT, Kurum dhe Enka.
Gjatë vizitës së presidentit turk Abdulla Gyl pritet t'i jepet një shtytje e mëtejshme bashkëpunimit ekonomik nëpërmjet zhvillimit të forumit të biznesit shqiptaro-turk.
(http://www.bbc.co.uk/albanian)