Ndërkohë ministri i Arsimit, Myqerem Tafaj, i cili ndodhet në Londër në një konferencë për arsimin e lartë tha se janë marrë të gjitha masat për të ndihmuar vijimin e shkollës për fëmijët e familjeve të evakuara si rezultat i përmbytjeve.

Zoti Tafaj i tha BBC-së se kudo që nxënësit kanë shkuar, do të përfshihen në shkollat lokale. Ai tha se kjo është e rëndësishme nga ana psikologjike që fëmijët të jenë në shoqërinë e fëmijëve.

Zoti Tafaj gjithashtu tha se është hartuar plani përkatës për këta nxënës që kur të kthehen në shtëpitë dhe shkollat e tyre të ketë një plan tjetër mësimor, i riorganizuar në atë mënyrë që fëmijët të realizojnë programin mësimor me shumë pak humbje, por duke e përfunduar vitin shkollor në njëjtën kohë me bashkëmoshatarët e tyre.

Opozita ndryshon kalendar

Ngjarjet në zonën e përmbytur po i ndjek dhe opozita shqiptare. Deputetët e saj dhe një grup vullnetarësh po shkojnë dhe po shpërndajnë ndihma pranë familjeve të përmbytura.

Deputeti socialist Ilir Beqja i tha BBC se kjo ndihmë nuk është pjesë e shtabit të emergjencës, por pjesë komplementare.

Deputeti socialist bëri gjithashtu të ditur se situata e krijuar në zonën e përmbytjes ka ndryshuar kalendarin politik të opozitës. "Kemi bërë ndryshimin e kalendarit politik, por ende nuk kemi marrë vendime të detajuara" tha deputeti socialist Ilir Beqja, por pa u shprehur nëse bëhej fjalë për ti dhënë fund bojkotit parlamentar të nisur që me hapjen e punimeve të parlamentit shtatorin e kaluar.

Zoti Beqja kujtoi se opozita ka parlajmëruar se do të hynte në parlament vetëm kur të plotësohej kërkesa e saj për hapjen e kutive të zgjedhjeve parlamentare të 28 qershorit, ose nëse cënohej siguria kombëtare e vendit.

"Kjo situate, në gjykimin tonë nuk është konstatuar ende," tha deputeti Ilir Beqja.

Meteorologët: reshjet do të vazhdojnë

E marta në Shkodër ka nisur me diell, por ka patur edhe reshje të dobëta shiu në pjesën më të madhe të territorit shqiptar, të cilat në zonat malore kanë qënë rreshje të pakta dëbore, thanë për BBC në MeteoAlb ku ekspertët parashikojnë gjatë ditëve të javës rreshje më të dobëta dhe ulje të temperaturave në zonat e përmbytura.

Niveli i Liqenit të Ohrit në Maqedoni është në kuotat maksimale kanë bërë të ditur autoritete nga enti hidrologjik.

Hidrologu, Josif Milevski jep më tepër hollësi për situatën:

"Niveli i ujit vazhdon të jetë në atë kuotë maksimale, ndërkohë që derdhjet janë minimale. Mbase do të duhet të ketë më shumë derdhje që mos të ketë rritje më të madhe", sqaron z. Milevski.

Për momentin, derdhjet në lumin Drin janë minimale.

Përgjatë lumit Drin i Zi në territorin e Maqedonisë ka hidrocentrale, çka bën që uji të kontrollohet edhe për nevojat e prodhimit të energjisë elektrike.

Por siç thonë ekspertët, nëse nivelet e ujrave rriten dhe në periudhën e kaluar kjo ka ndodhur edhe për faktin se shkrirja e dëborës shkarkonte ujrat nga mali direkt në lum, atëherë mund të rritet sasia e shkarkimit të ujrave.

Por ekspertët thonë se moti i ligë dhe i ndryshueshëm kësaj here mund të jetë përparësi. Sërish hidrologu Josif Milevski:

"Për fat këto ditë, parashikohet rreshje të pakta, edhe nëse ka reshje do të jetë dëborë. Ky parashikim është për ditët në vijim. Kjo gjë ka sjellë qetësimin e prurjeve të ujrave, dhe nëse mbahet kjo tendencë do të jetë mirë. Maqedonia për momentin është anashkaluar nga reshjet e mëdha, siç i shohim në vendet fqinje", tha Josif Milevski, hidrolog pranë Entit Meteorologjik.

Autoritetet në Shkup thonë se janë në komunikim të vazhdueshëm me ata në Shqipëri për të koordinuar situatat.