Përfaqësues të institucioneve në Kosovë nuk komentojnë idetë eventuale për temat e bisedimeve me palën serbe. Mediat serbe raportuan ditë më parë, për ekzistimin e një vullneti në Bruksel që në tryezën e diskutimeve ndërmjet Kosovës e Serbisë të vihen çështje si: doganat, transporti, trashëgimia kulturore dhe të tjera. Rishqyrtimi i këtyre çështjeve, të cilat thuhet se janë të precizuara në Pakon e Ahtisarit, vlerësohet i dëmshëm për Kosovën sikurse nga zyrtarët institucionalë ashtu dhe nga opozita e vendit.

Autoritetet në Prishtinë thonë se nuk janë në dijeni për ekzistimin e një propozimi më të precizuar nga Bashkimi Evropian për zhvillimin, formatin, kohën dhe temat e bisedimeve ndërmjet Kosovës dhe Serbisë.

Zëdhënësi i Presidencës në Kosovë, Xhavit Beqiri, thotë se pala kosovare mirëpret angazhimin e Bashkimit Evropian në lehtësimin e bisedimeve ndërmjet të dy vendeve, por se nuk mund të jepet ndonjë vlerësim për temat eventuale, për të cilat kërkohet dialogu.

"Ne mirëpresim angazhimin e Bashkimit Evropian për ta ndihmuar rajonin në rrugën e integrimeve euro-atlantike, mirëpo nuk dëshirojmë të paragjykojmë se çfarë temash mund të propozohen", thotë Beqiri.

Mediat serbe raportuan ditë më parë për interesin e BE-së që bisedimet ndërmjet Kosovës e shtetit serb të përqendrohen rreth bashkëpunimit në mbrojtjen e kufirit, rreth doganave, tregtisë e ekonomisë, transportit, telekomunikacionit, çështjeve të trashëgimisë kulturore e historike, si dhe rreth luftës kundër krimit të organizuar.

Beqiri thekson se gjithçka që ka të bëjë me këto çështje, tashmë është qartësuar në Planin e presidentit Ahtisaari dhe legjislacionit të Kosovës.

"Këto janë çështje, të cilat rregullohen në bazë të legjislacionit të Kosovës dhe ne besojmë se është një kornizë shumë e mirë ligjore, e cila garanton mbrojtjen e plotë të trashëgimisë kulturore - shpirtërore të secilit etnitet, si dhe ofron një perspektivë më të mirë për zhvillime të mëtejshme kulturore të secilit etnitet në Kosovë - edhe atë të pakicës serbe", thekson Beqiri.

Opozita në Kosovë e vlerëson negative për Kosovën rishqyrtimin e temave, të cilat, siç thuhet, janë vendosur tashmë. Nënkryetarja e partisë Aleanca Kosova e Re, Mimoza Kusari-Lila, thotë se rihapja e Planit Ahtisari do të ishte e dëmshme për vendin.