Para Asamblesë se Përgjithshme të OKBsë vërehet një ngecje në njohjet e reja për Kosovën Me gjithë pohimet e forta se është duke u lobuar për pavarësinë e Kosovës, njohja e fundit për vendin tonë ka qenë në muajin korrik. Zyrtarë të Ministrisë së Punëve të Jashtme pohojnë se kanë shfrytëzuar të gjitha kapacitetet e mundshme për t'i bindur shtetet hezituese, që ta njohin Kosovën, mirëpo pranojnë se ka një ngecje në njohjet e reja.
Në anën tjetër, udhëheqës partiakë e fetarë pohojnë të jenë të kyçur në mënyrë shumë aktive në lobimin për njohje të reja të shtetësisë së Kosovës.
Kështu, kryetari i AKR-së Begjet Pacolli pohon se është duke lobuar me të gjitha kapacitetet e veta për njohje të reja, ndërkohë që edhe kreu i Bashkësisë Islame të Kosovës, Naim Tërnava, javën që po lëmë pas, pat deklaruar se Kosova gjatë këtij muaji do të njihet nga disa shtete arabe.
Ndryshe, në prag të mbledhjes së radhës të Asamblesë se Përgjithshme të OKB-së, e cila do të fillojë punimet më 20 shtator, ku do të diskutohet edhe për Kosovën, shefi i diplomacisë serbe Vuk Jeremiq ka paralajmëruar se atje do të zhvillohet një beteje e madhe diplomatike.
Sesioni vjetor i Asamblesë së Përgjithshme të Organizatës së Kombeve të Bashkuara do të fillojë punimet më 20 shtator.
(http://www.rtklive.com)