Grosryk: Zgjedhjet parlamentare në Shqipëri më të mirat që ndonjëherë ka zhvilluar ky vend
E Shtunë, 08.22.2009, 08:47am (GMT+1)
Zyrtarë të lartë të OSBE-së vlerësuan sot se zgjedhjet parlamentare në Shqipëri ishin më të mirat që ndonjëherë ka zhvilluar ky vend. Derisa Partia Demokratike dhe Lëvizja Socialiste për Integrim përgatiten për përbërjen e kabinetit të ri qeveritar, OSBE paralajmëron se në shtator do të publikojë raportin përfundimtar për zgjedhjet e 28 qershorit.
Zëvendës-presidenti i Asamblesë Parlamentare të OSBE-së, Volfgang Grosryk, tha sot në Tiranë se zgjedhjet e përgjithshme të 28 qershorit në Shqipëri ishin të lira dhe pa tensione, me përjashtim të disa problemeve teknike. Zotëri Grosryk bisedoi me kryetaren e Kuvendit, kryeministrin, kryetarin e Partisë Socialiste dhe me kryetarin e Lëvizjes Socialiste për Integrim.
Zotëri Grosryk saktësoi se raporti për zgjedhjet do të dalë në shtator dhe shtoi se procesi ishte më i miri i mbajtur ndonjëherë në Shqipëri.
"Në përgjithësi ne mund të themi se këto janë zgjedhjet më të mira të zhvilluara ndonjëherë në Shqipëri. Ne jemi të kënaqur sepse kanë pasur përmirësime dhe ftoj politikën shqiptare që të bashkëpunojë në të mirë të vendit. Ka ende nevojë për të bërë dhe për të punuar më shumë", ka thënë z. Vofgang Grosryk Kryeministri Berisha tha se më 28 qershor janë shmangur tërësisht fenomenet që kanë nxirë proceset e mëparshëm, si listat e zgjedhësve dhe identifikimi i tyre. Zotëri Berisha tha se për herë të parë Komisioni Qendror i Zgjedhjeve miratoi çdo mandat deputeti, si dhe rezultatin e përgjithshëm me pajtim të plotë të të gjithë anëtarëve, përkatësisht 7-0.
Sakaq, kryetari socialist Edi Rama tha se nuk e njeh rezultatin e 28 qershorit dhe se zgjedhjet e parakohshme janë objektiv i partisë së tij.
Zotëri Rama tha se ky është qëndrim zyrtar dhe se Parlamenti ka legjitimitet të cunguar rëndë.
Ambasadori Grosryk u caktua koordinator special në ekipin e përkohshëm të vëzhgimit të zgjedhjeve nga kryesia e OSBE-së.
www.voal-online.ch
|