Sot ministri i Transportit dhe Postë-Telekomunikacionit të Kosovës, Fatmir Limaj, së bashku me homologun e tij, ministrin e Transportit të Republikës së Shqipërisë, Sokol Olldashi dhe me ish-ministrin e Transportit dhe ministrin aktual të Punëve të Brendshme të Shqipërisë, Lulzim Basha, morën pjesë në hapjen e galerisë veriore të tunelit të Kalimashit.
Ministrat Limaj, Olldashi dhe Basha, në prononcimin për medie, hapjen e galerisë veriore të tunelit të Kalimashit e cilësuan si një projekt shumë të rëndësishëm ekonomik, i cili përveç kësaj bën që Shqipëria dhe Kosova jenë më afër se kurrë.
"Jam i lumtur që kjo rrugë përfundoi në mënyrën më të mirë të mundshme në të gjitha afatet e duhura, me cilësinë e duhur dhe do të garantojmë që me hapjen edhe të galerisë së dytë, do të ketë trafik të vazhdueshëm të pa pengesa midis Shqipërisë dhe Kosovës, Shqipërisë dhe verilindjes së saj", deklaroi midis tjerash ministri Olldashi në fjalën e tij përuruese.
Ndërkaq, ministri Fatmir Limaj, në fjalën e tij të rastit, tha:
"Më lejoni që të shpreh respektin dhe mirënjohjet e mia të veçanta për Qeverinë e Republikës Shqiptare, për dy akterët që janë sot këtu ish-ministrin e Transportit, z. Lulzim Basha, ministrin aktual, z. Sokol Olldashi, por edhe vetë kryeministrin e Republikës së Shqipërisë, Sali Berishën, për këtë projekt gjigand, i cili dikur ka qenë i paimagjinueshëm, por që sot u bë realitet. Jua uroj përfundimin e këtij projekti madhor në pjesën shqiptare".
"Realizimi i këtij projekti vjen si rezultat i seriozitetit, angazhimit dhe këmbëngulësisë së qeverisë shqiptare, për ta përfunduar këtë rrugë, që njëherësh realizimin e kësaj rruge e ka ngritur në top agjendë edhe të Republikës së Kosovës", tha në vazhdim ministri Limaj dhe shtoi:
"Ky është një transformim i gjithanshëm social dhe politik-ekonomik, që po u bëhet vendeve tona, por edhe rajonit dhe unë mendoj se të gjithë shqiptarët duhet të ndihen krenarë që fuqia e shtetit të tyre ka ardhur në nivel të tillë për të ndërtuar vepra gjigante dhe kaq të mrekullushme".
Lulzim Basha, ish-ministër i Ministrisë së Transportit dhe ministër aktual i Punëve të Brendshëme, me rastin e hapjes së galerisë veriore të tunelit, midis tjerash tha:
"Sot po realizohet edhe një ëndërr shumë e madhe, e cila nuk mund të përthekohet me një ose dy fjali, Ne së shpejti do të fillojmë tunelin e Elbasanit, i cili përshkon rrugën Tiranë- Elbasan dhe projekte të tjera. Ky projekt është më shumë se sa kjo rrugë, është projekt ekonomik dhe komercial, është projekt i shpirtit shqiptar, i fuqisë dhe besimit të kombit shqiptar te vetvetja," është shprehur Basha.
Më pas, ministrat Fatmir Limaj, Sokol Olldashi dhe Lulzim Basha, vizituan edhe punimet në autostradën Vërmicë-Merdar në segmentin e parë Vërmicë-Prizren.
(http://www.rtv21.tv)
Comments (0)
Dërgoja shokut
Printo
