-Më 17 (shtatëmbëdhjetë) Prill të këtij viti,saktësisht në orën 16, filloi Akademia Përkujtimore kushtuar jetës dhe veprës së dëshmorit të kombit, Xhemajli Berisha. Profesorin që iu bënë nderimet në Shtëpin e Kulturës në qytetin e lashtë të Ymer Prizrenit, kam privilegjin që e kam njohur dhe e kam pasur shok për koke siç thuhet. U gëzova që, edhe pse, vetë nuk munda të marrë pjesë në atë Akademi ( për shkaqe shëndetsore), por së paku e pashë ekranit, Aty pashë edhe Loken e madhe, nënën e dëshmorit, prej duarëve të së cilës kam ngrënë bukë dikur...
-Po ç`më shtyri ta bëj këtë shkrim-reagim?..
E gjithë rrjedha e programit shkonte mbarë, së paku kështu më dukej mua, gjerësa nuk doli në skenë Ismeti, përfaqësuesi i Klubit Politik "Afrim Zhitia", i cili përpara të pranishmëve, i propozoi kryetarit të komunës së Prizrenit, Ramadan Muja, që të ndërrojnë emrin e Kryeplakut të Lidhjes së Prizrenit, Ymer Prizrenit, emrin e të cilit e mban me pietet të lartë Shkolla Pedagogjike, ku ka punuar si mësues Xhemajliu dikur, dhe në vend të tij, shkolla të ripagëzohet me emrin Xhemajli Berisha.
Për çudin time të madhe, kryetari i nderuar i qytetit, z.Ramadani, ra nën ndikimin e duartrokitjeve,dhe nuk hezitoi të zotohet se, do të nisë me procedurat përkatëse menjëherë për të vënë në vend propozimin në fjalë... Nuk desha të besoj, por ajo që pashë me sy, më tronditi...
Kush e paska ate të drejtë, mendova, që të bëjë tregëti me emrat e heronjve.
Heronjtë janë një familje, nuk kanë as kohë as hapësirë të ndarë, janë pa parti, janë të përjetshëm...
Po përse more vëlla Ismet, përse nuk shkon në Tiranë, në Strugë, në Ulqin e kudo tjetër e të gjesh, dhe do të gjesh vende, sheshe e institucione që duhet ta mbajnë emrin e ndritur të Xhemajliut. Xhemajliu është shqiptar, është biri i kombit, ndaj do t`i ketë rënduar ajo fjalë edhe nën Dhé... Bëhu burrë Ismet e kërkoi falje Xhemajliut, kjo të nderon, jo ndërrimi i vendeve të heronjëve, ata janë bashkë, si yjetë në qiell...
Titulli është i redaksisë të Voal-online