Prishtinë, 19 dhjetor - Mundësitë që para Vitit të Ri, të lirohet James Berisha nga paraburgimi në Eritre, janë shumë të vogla. Autoritetet e atjeshme vazhdojnë ta konsiderojnë lobuesin shqiptaro-amerikan si spiun. Ndërkaq, MPJ-ja dhe zëvendëskryeministri Behgjet Pacolli përsërisin premtimet për lirim të tij dhe angazhimin e tyre.
James Berisha, sipas të gjitha gjasave, ndërrimin e vitit do ta kalojë në ndonjërin nga burgjet e Eritresë. Piloti kosovar me nënshtetësi amerikane, që nga muaji gusht gjendet në paraburgim, diku në këtë shtet afrikan.
Mundësitë për lirimin e tij, janë të vogla, ndonëse gjatë muajve të kaluar ishin dhënë premtime të mëdha nga zyrtarët vendas, se Berisha së shpejti do të kthehet në Kosovë.
Këto premtime janë dhënë si nga Ministria e Punëve të Jashtme, ashtu edhe nga Zëvendëskryeministri i parë i Kosovës, Behgjet Pacolli.
Por deri më tash, del se askush nuk e mbajti fjalën, shkruan "Express". Nga Zyra e zëvendëskryeministrit Pacolli bëhet e ditur se ai është në kontakt të vazhdueshëm me këshilltarin e presidentit të Eritresë dhe vetëm është duke pritur ftesën për të shkuar atje.
(http://www.koha.net)
Comments (0)
Dërgoja shokut
Printo
