VOAL - Online Zëri i Shqiptarëve - PËRUROHET NUMRI I RI I REVISTËS 'PEGASI'Revista përgatitet nga një redaksi e emigrantëve shqiptarë, në AthinëReportazh nga MURAT GECAJ

1.
Në bibliotekën e Muzeut Historik Kombëtar të kryeqytetit u bë paraqitja e numrit të ri të revistës periodike, për letërsi dhe arte, "Pegasi". Ajo përgatitet nga një redaksi e emigrantëve shqiptarë, në Athinë.

Ishin të pranishëm shkrimtarë e poetë, punonjës të arsimit e kulturës dhe të tjerë, si nga Tirana e Durrësi. Fjalën e hapjes, për nr. 11 të kësaj reviste, e mbajti Agim Pipa. Drejtori i "Pegasit", Grigor Jovani, përmbledhurazi, u tregoi të ftuarëve për ato çështje, që janë shënuar në faqen e fundit të kësaj reviste. Aty, ai ka shkruar edhe këto fjalë: "Tashmë, që kapërcyem dekadën e parë të numrave të "Pegasit", duke hyrë kështu në vitin e tetë të botimit, Redaksia e ndjen dëshirën të falënderojë të gjithë ata miq dhe bashkëpunëtorë, në të katër anët e Globit, që gjatë kësaj kohe nxitën dhe ndihmuan punën tonë, duke na falur "kusuret" e një përpjekjeje, gjithësesi të vështirë, në kushtet po kaq të vështira të emigrimit. Numri i 11-të, që kemi gëzimin t'ua ofrojmë dashamirësve tanë, besojmë se është kurorëzim i gjithë kësaj përvoje, rezumeja e mendimeve të atyre, që dëshirojnë një "Pegas" bashkëkohor, të denjë për qiejt e letërsisë dhe të arteve".
Në përgjithësi, rreth këtyre mendimeve u përqendrua edhe kryeredaktori i revistës "Pegasi", Miho Gjini-"Mjeshtër i Madh". Ai tha se ky "kalë fluturues ushqehet me tagjinë", që përgatisin autorët krijues, si në Shqipëri e në trojet tjera amtare, por dhe në diasporën e Europës dhe deri në Amerikë. Prandaj është e nevojshme që të rritet numri i bashkëpunëtorëve të kualifikuar dhe të mbështetet sa më shumë prej tyre, duke bërë edhe pajtime vjetore në këtë revistë, tashmë, të njohur e cilësore, si me shkrimet dhe paraqitjen figurative të saj. Po për këtë gjë, u shpreh edhe përgjegjësja e marrëdhënieve me publikun në revistë, Liliana Furrxhiu (Sinani).

Në diskutimet vazhduese, që u bënë nga të pranishmit në përurim, si Ndoc Ndreaj, M.Gecaj, Izet Duraku, Agron Bala, Kozeta Zavalani, Rexhep Shahu e Merita Dabulla etj., u mbështet e u përgëzua redaksia e kësaj reviste, për të gjithë numrat e botuar, deri tani. Por, veçanërisht, u theksua bashkëpunimi i pandërprerë, që duhet të vazhdojë në të ardhmen. Sigurisht, kjo gjë do të mundësojë daljen e revistës rregullisht dhe do ta bëjë atë gjithnjë e më cilësore, në përshtatje me kërkesat në rritje të lexuesve të saj.

2.
Nr. 11 i revistës "Pegasi", e cila ndodhet edhe në libraritë e Tiranës, ka 128 faqe dhe është me letër speciale e ngjyra të bukura. Në hapje ka editorialin e shkruar nga Ndue Lazri (Bolonjë), "Kështjella, që ha libra"(Një problem, që nuk është më vetëm... "i yni"). Duke e shfletuar më tej atë, të bien në sy krijimet e disa autorëve të njohur, si në poezi e në prozë. Ato janë të vendosura në disa rubrika, si "Ditaret", "Tregime", "Esse", "Të kurorëzuarit", "Letërsi e huaj", "Kafe me fqnjët", "Arti & Pushteti", "Galeria kulturore e Kombit", "Stafeta në duart e tyre", "Diaspora", "Muzikë", "Arte figurative", "Eksluzive", "Teatër", "Kinematografi", "Intervista", "Bashkëkohës & Kundërshtarë", "Në fokus", "Portret" e "Reportazh".

Një rubrikë tjetër, që tërheq vëmendjen e lexueve të kësaj reviste është ajo me titullin "Ata që ikën", kushtuar disa figurave të shquara të letërsisë e arteve, që janë ndarë përgjithnjë nga jeta. Kështu, shkruhet për jetën dhe veprimtarinë e Bilal Xhaferrit, Minella Borovës, Milianov Kallupit e Jorgo Telos.

...Në mbyllje të këtyre pak radhëve, nga përurimi i numrit të ri të revistës "Pegasi", gjejmë rastin ta përgazojmë redaksinë për punën e bërë, deri tani dhe shprehim besimin se, në të ardhmen, do të mbështetet më fuqishëm nga bashkëpunëtorët e shumtë të saj dhe, pse jo, nga organet përgjegjëse shtetërore, në Shqipëri.

Tiranë, 26 janar 2014