Publikuar: Sot, më 24 maj 2011
Beograd, 24 maj Trafikantët e drogës dhe plaçkitësit e bankave, si dhe argjendarive nga Serbia janë aktivë në tërë botën, shkruan të hënën gazeta beogradase "Veçernje Novosti".
Nuk kalon pothuajse asnjë javë dhe mediat botërore të mos shkruajnë për "ndërmarrjet" e grupeve kriminale nga Serbia. "Novosti" për këtë arsye vlerëson që mafia ndodhet në rrugë të mirë për t'u bërë "brend" eksportues i Serbisë.
Incidenti më i ri ka ndodhur gjatë fundjavës në Madrid, ku policia spanjolle arrestoi 29 gangsterë serbë, të dyshimtë për plaçkitje dhe mashtrime në Spanjë, Portugali si dhe Francë. Ky grup kriminelësh ishte i ndarë në katër grupe. Njëri kishte vepruar në jug të Spanjës, tjetri në rajonin e Baskisë, në veri të Spanjës dhe jug të Francës, i treti në qytetin lindor spanjoll Kastelon, derisa i katërti vepronte në Portugali.
Një javë më parë, spanjollët patën zbuluar një grup shtatanëtarësh të trafikantëve të drogës nga Serbia dhe Mali i Zi, te të cilët ishin gjetur 77 kilogramë kokainë.
Se kriminelët malazezë dhe serbë janë tregtarët më të mëdhenj të kokainës nga Amerika Jugore në Evropën Perëndimore nuk është më sekret. Aksioni "Niva", të cilin e pati filluar policia serbe para dy vitesh, duke ua "bartur" më pas brazilianëve, neutralizoi vetëm një pjesë të organizatës mafioze.
Brazilianët para më shumë se dy javësh ia dolën të arrestonin një pjesë të madhe të mafiozëve serbë në krye me Goran Neshiq Cigan, bashkëpunëtorin e Darko Shariqit. Lideri i klanit novobeogradas, Dejan Stojanoviq Keka ia doli t'i shpëtonte arrestimit në Brazil dhe supozohet se ai tani ndodhet në Bolivi.
"Pink Panterët"
"Këta kriminelë janë klasë e lartë, ndonëse për nga ndikimi ndërkombëtar as që mund të maten me "˜Pink Panterët'", plaçkitësit e argjendarive nëpër botë", thekson Zoran Nikoliq, ish-bashkëpunëtori shkencor i Institutit të Hulumtimeve Kriminologjike dhe Sociologjike.
Për shkak të plaçkitjeve spektakolare të stilit hollywoodian, këta banditë serbë janë bërë të njohur në mbarë botën.
"Mafia jugosllave" në Danimarkë
Mafia serbe është e pranishme edhe në veri të Evropës. Policia daneze kohë më parë ka pranuar se në këtë shtet, mirëpo edhe në tërë Skandinavinë, vepron "mafia jugosllave". Aktualisht tri grupe të organizuara mrekullueshëm me përbërje multietnike, të cilat i udhëheqin bosët serbë, janë duke i nxjerrë më së shumti telashe policisë në Kopenhagë dhe në qytetet e tjera të mëdha daneze. Këto grupe kryesisht trafikojnë armë dhe e importojnë drogën për tregun danez e suedez, para së gjithash, kokainën.
Sipas të dhënave të policisë suedeze, mafia serbe ka bastione në Malmo dhe Stockholm, ku klanet kontrabandojnë duhan, alkool dhe drogë.
"Mafia serbe në veri të Evropës megjithatë nuk është e organizuar aq mirë sa për t'u renditur në krye të krimit evropian", konstaton Nikoliq.
Polerto Savijano, eksperti italian për krime, thotë se në Itali ekzistojnë tri klane të mëdha mafioze që përbëhen nga njerëzit nga Serbia. Fjala është për mafinë e kokainës, veturave dhe mafinë e prostitucionit.
"Kriminelët tanë qysh në periudhën e socializmit bënin kërdi nëpër Evropë. Sot, kur tregu i brendshëm është i vogël, grupet kriminale po vendosin të dalin jashtë", ka thënë Zoran Nikoliq.
(http://www.koha.net)