VOAL - Online Zëri i Shqiptarëve - JANARËT HISTORIKISHT ISHIN MUAJ TË KOBSHËM PËR SHQIPTARËTNga Dr. NASER RUGOVA

Si kombi më i lashtë në këtë tokë të shënjtë, në këtë muaj të acartë mbetëm pa prijës, dijetar, strateg dhe kolosët më të ndritur të kombit tonë.

Para katër ditësh përkujtuam në të njëjtën ditë përvjetorin e vdekjes së kryetrimit Gjergj Kastrioti, të vëllezërve Gërvalla dhe Smajl Hajdarajt personalitete që në etapa dhe rrethna të ndryshme kohore dhe historike ishin gurthemel i lirisë, mvetsisë, dinjitetit dhe identitetit nacional.

Janari ky muaj i ftohtë na ndau fizikisht pra nentë vitesh edhe nga intelektuali i madh, vizionari, ideatori , njeriu i urtë por i pathyeshëm në rrugën e tij, arkitekti i shtetit modern të Kosovës Dardanisë Antike, Presidenti Historik dr.Ibrahim Rugova. Jeta është dhuratë e cmuar nga zoti, kohën e kufizuar të së cilës duhet shfrytëzuar për të bërë gjëra me vlerë! Njeriu ndërton veprat pastaj janë veprat ato për të cilat kujtohet njeriu.
Presidenti Rugova në jetën e tij, të përfunduar më herët se sa duhej, zgjodhi të bënte veprën më të vështirë! Vendosi të dalë në ballë të një populli dhe të një toke të lashtë të robëruar me shekuj! Ai ja dedikoj jetën tokës dhe popullit të tij. "Kokën mund të ma hiqni, por mendjen kurrë nuk mund të ma ndryshoni", ju pati thënë publikisht rexhimit pushtues, duke vazhduar rrugën plot sakrifica si lider i urtë, i përgjegjshëm, vizionar dhe si shpresë e ketij populli se do jemi të lirë dhe të pavarur!

Liri, demokraci, pavarësi u bënë postulatet e shënjta të këtij populli që me sakrifica sublime të udhëhequr në mënyrë dinjitoze nga një intelektual urtak qe me kohën u bë lider shpirtëror i popullit të vet. Liria dhe pavarësia e vendit tonë ishte karvan i gjatë dhe i mundimshëm në të cilin njerëz të shumtë dhe më të devotshëm përgjatë epokave dhanë shtytjen e tyre. Ta ndryshosh kahjen e këtij karvani në rrugën e drejtë të lirisë dhe mvetësisë nuk ishte fare e lehtë, njerzit që bëjnë kthesa të tilla historike në moment të rënda për kombin dhe atdheun do të kujtohen me admirim nga brezat dhe do lënë përgjithmonë vulë lavdie në historinë tonë kombëtare. Prej të rrallëve në krye të karvanit të popullit të Kosovës që kujtohet me dashuri nga populli i tij është Presidenti Rugova.
Njeriu që bëri historinë e Kosovës moderne!

Ibrahim Rugova u shëndrrua në ikonë të shpresës për liri, në simbol të qëndresës shekullore shqiptare!

Ishte prijës që me politikën e tij vizionare ktheu sytë e botës demokratike dhe miqve tanë në krye me SHBA-të kah vendi ynë i bekuar, i artikuloi kërkesat, i harmonizoi me miqët tanë dhe së bashku mundëm të keqen, e fituam lirinë dhe shtetin! Ishte dhe vazhdon të jetë frymëzim për brezat!

Sa herë që shteti dhe politika e Kosvovës të gjinden në udhëkryq, le ta kthejnë kokën mbrapa dhe le të shiqojnë kah Presidenti Historik, frymëzimi, vizioni dhe rruga e ndritur për popullin dhe vendin tonë janë aty! Gjithmonë, për jetë e mot!

Në histori pak breza kanë fatin të jenë protagonist të ngjarjeve dhe epokave të lavdishme kombëtare. Ne patëm fatin të jetojmë në kohën e orifeut ndër më të mëdhenj të këtij kombi të lashtë.

Pusho i qetë baca Ibrahim, ëndrra dhe vizioni yt po jetësohen, fryma jote po rikthehet fuqishëm si udhrrëfyes për këtë popull dhe vend brilant!