MUZG NË MALE Poezi të reja nga QAZIM D. SHEHU
E Martë, 12.02.2014, 09:31am (GMT+1)
MUZG NË MALE
Shije e muzgut, Flirt vegimesh, Ngjyhet në ngjyrë gushe, Gjakun e kaltër të ëndrrës Shfryn. Ku të shkosh në këtë muzg malesh, Në këtë qiell të humbur, Ku rrugët , Damarë të plakur, S`thithin dot asgjë të bukur. Me siguri do humbas këtu, Nën këtë rëndesë muzgu, Si pas një nuseje të rrëmbyer Humbet krushku...
VEGIM
Derdhet ujëvara Flokë- flokë, Si koka e një vajze që dënes, Dhe mëkatin s`e thotë... Derdhet ujë, Palë palë. Mos në greminën e zgjeruar, Një vajzë është ende gjallë...
TRËNDAFILAT E DHUNUAR
...errësirë thithëse, bora shtrihet e largët, Sytë e errësirës Shpojnë dritaret, Trëndafila të dhunuar, Nga që s`munda Ty, Me t`i dhuruar...
FIJE BARI
Në jermin e pranverës Ngritën kryet me hijeshi Fije bari mes gurit. Guri, stërgjysh i fortë, Barin përkëdhel Me grimca ngazëllyese, Gjakun e ngrirë të moteve Shpërthen Për këto fje bari. Gjersa me to mbulohet Me një harresë të marri...
KTHETRAT
Kur ik koha e vjen paskoha Dashuria merr kthetrat e shqiponjës, Në forcë të vet i humbet loja Grihet në dëshirë të plojës.
Si hijen e trupit që s`e shmang, Mbeten këto kthetra, Dhe sa më shumë ngjitesh lart, Aq humb nga vetja. Ç`gjah kap me to s`e di, Pengun e parealizuar; mos, Duke u ngjitur për dashuri, Veten humb, veten sos?...
QAZIM D. SHEHU
|