Voal-online
Forcat e armatosura amerikane kanë bërë mësymje në luginën strategjike të
Helmandit, në Jug të Afganistanit, në një operacion të cilin zyrtarët amerikanë
e kanë quajtur operacionin më të madh që nga Lufta e Vietnamit.
Në mësymje
marrin pjesë pothuaj 4 000 marinsa dhe ushtarakë të tjerë të SHBA së bashku me
650 ushtarakë afganë, një pjesë e të cilëve policë. Janë mobilizuar 50 avionë
dhe një numër i pasaktësuar helikopterësh që e kanë shoqëruar mësymjen sidomos në
momentet e para.
Operacioni
quhet "Khanjar" (goditje shpate) dhe karakterizohet, siç ka deklaruar gjenerali
i brigadës Larry Nicholson, nga numri masiv i pjesëmarrësve dhe nga shpejtësia
e jashtëzakonshme e veprimit. Synohet që pozionet të cilat iu merren talebanëve
të mbahen. "Atje ku do të shkojmë, do të qëndrojmë," ka thënë komandanti i
brigadës "Afganistan" të marinsave. Dy vjet më parë trupat britanike ishin
detyruar të largoheshin nga kjo zonë, për shkak të sulmeve të pareshtura
talebane. Prej atëherë talebanët kanë vendosur këtu pushtetin e tyre.
Helmand
është një zonë me sipërfaqe sa Irlanda dhe është një nga bastionet më të
fuqishme të talebanëve, ku prodhohet gjysma e opiumit afgan që ushqen 90% të
tregut botëror. Popullsia është kryesisht pashtun, grupi etnik më i madh afgan.