Disa
ligjvënës amerikanë po bëjnë thirrje për veprime urgjente nga Shtetet e
Bashkuara kundër Shtetit Islamik, pas njoftimeve për ekzekutimin e
gazetarit amerikan Steven Sotloff nga grupi militant.
Dy udhëheqës të kongresit dje folën në një telekonferencë të
planifikuar më parë nga Jeruzalemi rreth vizitës së tyre në Izrael, pak
kohë pas publikimit të videos së fundit të Shtetit Islamik.
Kryetari i Komisionit të Dhomës së Përfaqësuesve për Marrëdhëniet me
Jashtë, Ed Royce tha se ai është i "tmerruar" nga ajo që duket të jetë
vrasja e një gazetari amerikan nga grupi ekstremist. Ai dhe ligjvënësi
Eliot Engel thanë se i shprehin ngushëllime nënës së Steven Sotloff, e
cila kohët e fundit publikoi një video ku kërkonte lirimin e djalit të
saj.
Ligjvënësi republikan Ed Royce theksoi se ISIS ka ekzekutuar me
prerje kokash, ka kryqëzuar dhe ka vrarë në mënyra të ndryshme mijëra
njerëz të pafajshëm në Irak dhe në Siri, dhe tani është duke përdorur
videot në përpjekje për të krijuar një kalifat virtual në internet.
"Ajo që është unike në lidhje me strategjinë e ISIS-it
është publikimi i këtij informacioni, mënyrën në të cilën ky grup
mburret me kapacitetin e tij për të vrarë dhe për të terrorizuar".
Ligjvënësit Royce dhe Engel ranë dakord se Shtetet e Bashkuara duhet të
drejtojnë një koalicion ndërkombëtar për të mposhtur Shtetin Islamik,
përmes sulmeve ajrore dhe sulmeve me avionë pa pilot, dhe duke ndihmuar
luftëtarët kurdë dhe të tjerët që luftojnë kundër ISIS-it në terren.
Ligjvënësi Royce tha se Shtetet e Bashkuara duhet të godasin kampet e
trajnimit të Shtetit Islamik. Ligjvënësi demokrat, Eliot Engel tha se
grupi militant është një kërcënim për botën e qytetëruar.
"Tani ISIS kontrollon një pjesë të madhe të territorit në
Irak dhe në Siri. Ky është një nga grupet e para terroriste që vërtetë
kontrollon një shtet për herë të parë, dhe në qoftë se ne nuk i
shkatërrojmë dhe nuk i mundim këta militantë, ata do të sulmojnë vendet
në mbarë botën".
Ligjvënësi Ed Royce tha se komisioni i tij do të mbajë një seancë
dëgjimore për kërcënimin që vjen nga Shteti Islamik pasi Kongresit të
kthehet nga pushimet javën e ardhshme. Ligjvënësi Engel tha se pas
skadimit të 60 ditëve në bazë të Aktit të Luftës, Presidenti Barack
Obama duhet të shkojë në Kongres për të kërkuar më shumë kompetenca për
intensifikimin e sulmeve ajrore kundër Shtetit Islamik në Irak.