Presidenti i Rusisë, Dmitri Medvedev, tha se vendi tij do të jetë më i vemendshëm ndaj shqetësimeve të Amerikës pas vendimit të Presidentit Obama për të braktisur planet e sistemit të mbrojtjes nga raketat në Evopën qendrore.

Presidenti Medvedev tha se fakti që autoritetet amerikane i kushtuan vemendje shqetësimeve ruse lidhur me instalimet e mundëshme kundër raketave në Poloni dhe në Republikën Çeke, tregon se Rusia duhet të dëgjojë më me vëmendje partnerët amerikanë. Por në komentet që bëri për gazetarët zviceranë, zoti Medvedev tha se Rusia nuk është e interesuar për “kompromise primitive”, siç u shpreh ai.

Në komentet e bëra po dje kryeministri rus, Vladimir Putin tha se shpreson se do të pasojnë masa të tjera që do të përmirësojnë marrëdhëniet.

Presidenti Obama njoftoi dje anulimin e planeve për sistemin e mbrojtjeve nga raketat në Poloni dhe Republikën Çeke në favor të asaj që e quajti një përqasje të re për mbrojtjen e Shteteve të Bashkuara dhe aleatëve të NATO-s.

Kreu i agjencisë kryesore të zbulimit amerikan beson se akuzat për manipulimin e zgjedhjeve nuk do ta pengojnë rizgjedhjen e presidentit afgan Hamid Karzai.

Drejtori i CIA-s Leon Paneta i tha Zërit të Amerikës se dukej qartë që në votimet e gushtit kishte manipulime. Por ai thotë se zoti Karzai "ende duket se do t'i fitojë zgjedhjet e përgjithshme."

Shifrat paraprake të publikuara të mërkurën tregojnë se zoti Karzai ka marrë 54 përqind të votave, më shumë se 50 përqind që i duheshin për të shmangur balotazhin me ish ministrin e jashtëm Abdullah Abdullah.

Zgjedhjet u zhvilluan ndërkohë që zyrtarë të lartë amerikanë përpiqen të vendosin se si të mundin kryengritësit talebanë të cilët kanë zhvilluar një fushatë gjithnjë e më efikase për zgjerimin e influencës së tyre.

Bashkimi Evropian ka rënë dakord t’i japë Serbisë një shumë prej 148 million dollarësh. Në këmbim, Sërbia duhet të vazhdojë punën drejt integrimit evropian.

Komisionieri i Bashkimit Evropian për zgjerimin, Oli Ren tha se kjo shumë do ta ndihmojnë Sërbinë të mbulojë shpenzimet për nevojat e saj krysore, megjithë vështirësitë buxhetore për shkak të krizës ekonomike globale.

Ai tha se ndihma ishte gjithashtu e kushtëzuar me zbatimin e mëtejshëm të marrëveshjes së Serbisë me Fondin Monetar Ndërkombëtar.

Në fillim të këtij muaji, presidenti serb Borist Tadiç tha se objektivi  kryesor politik i vendit të tij është integrimi në Bashkimin Evropian.

Ministrat e Jashtëm të Izraelit dhe Malit të Zi nënshkruan një marrëveshje për të hequr vizat për shtetasit e dy vendeve.

Ministri i Jashtëm i Malit të Zi Milan Rocen dhe homologu i tij izraelit Avigdor Liberman e nënshkruan marrëveshjen sot në Podgoricë.

Ministrat thanë se marrëveshja mund të nxisë shkëmbimet ekonomike dhe marrëdhëniet e tjera mes dy vendeve.

Zoti Liberman nënvizoi se investitorët izraelitë janë të interesuar në industri të ndryshme malazeze.

George Bush arriti ta joshë Evropën Lindore dhe udhëheqësit e rajonit iu bashkuan me shpejtësi “koalicionit të të vullnetshmëve”, të krijuar nga ai pas sulmeve të 11 shtatorit 2001. Tani, shumë njerëz - si zyrtarë, ashtu edhe qytetarë të thjeshtë - ankohen për atë që e perceptojnë si neglizhencë nga ana e administratës së Obamës.

Kjo është një zhvendosje e jashtëzakonshme në këtë rajon, i cili për një kohë të gjatë ka qenë i mësuar me marrëdhëniet komode me SHBA. “Tani vërejmë fillimin e një indiference”, - thotë historiani dhe hulumtuesi rumun Tudor Salajean.

Madje, herëpashere dhe në disa pjesë, disponimi i ri është i afërt me armiqësi. Dy prej tre bullgarëve, çekëve, polakëve dhe rumunëve e mbështesin politikën e jashtme të Obamës, dëshmoi anketimi i realizuar nga Fondi Gjerman i Marshallit. Kjo përkrahje mund të cilësohet si mjaft e fuqishme, por ajo duket e mjerë, nëse krahasohet me përkrahjen e Obamës në Evropën Perëndimore, ku nëntë nga dhjetë të anketuar mbështetin Obamën.

Ish presidenti Xhimi Karter tha se sulmet në rritje kundër Presidentit Obama janë të lidhura me racën.