KOSOVË - DISKUTIMI PËR GJYKATË TË POSAÇME ÇON NË PËRPLASJE TË RE MES EULEXit DHE QEVERISË
E Enjte, 02.27.2014, 08:22am (GMT+1)
Në Kosovë, muajin e ardhshëm pritet të diskutohet mbi një propozim për themelimin e një Gjykate të veçantë që do të merrej mes tjerash me trajtimin e pretendimeve të ngritura nga i dërguari i Këshillit të Evropës Dick Marty, mbi siç thuhet, përfshirjen e disa prej ish-drejtuesve të Ushtrisë Çlirimtare të Kosovës, në krime të luftës. Ideja e hedhur nga grupi hetues i EULEX-it për hetimin e këtyre pretendimeve kundërshtohet nga autoritetet në Kosovë, meqë sipas tyre kjo do të nënkuptonte dështimin e sistemit të drejtësisë që vazhdon të kontrollohet nga ndërkombëtarët.
Qeveria e Kosovës ia ka prezantuar Bashkimit Evropian pozicionin e saj lidhur me rishikimin strategjik të misionit të EULEX-it, duke i dhënë propozime edhe për kompetencat dhe funksionin që duhet të ketë misioni i ri, për kohën sa duhet të zgjasë mandati i tij, e madje edhe për emrin që duhet ta mbajë.
Propozimi i Qeverisë është që prania e re evropiane të quhet Misioni Këshillues për Rend dhe Ligj. Institucionet e Kosovës vlerësojnë se situata në vend ka ndryshuar në vitet e fundit dhe se tashmë ekziston një realitet i ri sa i përket fushës së sundimit të ligjit.
Institucionet kanë shprehur gatishmërinë e tyre për të marrë përsipër kompetencat për kryerjen e detyrave, të cilat kanë qenë nën mandatin e tanishëm të EULEX-it.www.voal-online.ch
|
Comments (0)
Dërgoja shokut
Printo
