Anëtarë të familjarëve të vrarë në atentate politike janë mbledhur sot para Qeverisë dhe Parlamentit të Kosovës për të kërkuar drejtësinë e vonuar tash e 16 vjet.

Të indinjuar nga neglizhenca e deritanishme e institucioneve të drejtësisë në Kosovë që të merren me zbardhjen e vrasjeve politike, familjarët e të vrarëve, që të gjithë aktivistë dhe veprimtarë të LDK-së kërkojnë themelimin sa më të shpejtë të Gjykatës Speciale, e cila sipas tyre do të duhej të merret me vrasjet ndërshqiptare gjatë dhe pas luftës në Kosovë.

Në emër të familjarëve, vajza e Enver Malokut, Doruntinë Maloku tha se "familjet e të vrarëve janë të indinjuar me dështimin e sistemit të drejtësisë në Kosovë, jo vetëm atij vendor, por edhe të UNMIK-ut dhe EULEX-it, andaj shpresa jonë e vetme mbetet trajtimi i këtyre rasteve nga Gjykata Speciale".

"Shpresojmë që Gjykata Speciale do t'i trajtojë me seriozitet këto raste dhe institucionet tona do ta nxisin atë që ta bëjë punën e saj, pra të vë drejtësinë në vend", tha Maloku.

Shpresa e saj për zbardhjen e këtyre rasteve qëndron edhe në faktin se Gjykata Speciale nuk do të jetë e ndikuar nga politika në Kosovë, meqë sipas saj ajo nuk do të veproj në territorin e Kosovës.

Deputetja Maloku ka shpresë edhe në mbështetjen e kryeministrit Mustafa, i cili në deklarimet në media pas marrjes së pushtetit ka deklaruar se do ta inkurajoj sistemin e drejtësisë që të merret me këto raste, në mënyrë që familjarët ta kuptojnë se kush ishin vrasësit e më të dashurve të tyre.

Haki Ymeri, kryetar i Shoqatës Thirrje për Drejtësi shpreson se me krijimin e Gjykatës Speciale do të zbardhet e vërteta për vrasjet e pasluftës në Kosovë.

"Unë bazohem në fjalët e prokurorit Willimason se vrasjet gjatë dhe pas luftës do të trajtohen nga Gjykata Speciale dhe unë besoj se kjo do të ndodhë", tha Ymeri.

Ai beson shumë se qeveria e drejtuar nga kryeministri Isa Mustafa do të merret me zbardhjen e këtyre rasteve, por se gjithçka nuk mund të zgjidhet brenda 30 ditëve.