VOAL - Online Zëri i Shqiptarëve - Berisha ngre flamurin në selinë e Aleancës

Bruksel, flamuri shqiptar, i pari në rreshtin e flamujve të NATO-s

Flamuri shqiptar do të ngrihet sot në selinë e NATO-s në Bruksel përkrah flamujve të 27 vendeve të tjera anëtare të Aleancës. Në ceremoninë e ngritjes së flamurit shqiptar në selinë e Aleancës do të jetë kryeministri Berisha, i cili u nis dje në krye të delegacionit shqiptar për në Bruksel. Në këtë ceremoni, të drejtuar nga Sekretari i Përgjithshëm i NATO-s, Jaap de Hoop Scheffer, do të jenë të pranishëm 26 ambasadorët e vendeve anëtare të NATO-s dhe delegacionet e Shqipërisë dhe Kroacisë, të kryesuar nga kryeministri Berisha dhe kryeministri kroat Sanader, në përbërjen e të cilëve do të jenë edhe ministrat e Punëve të Jashtme respektivë dhe ambasadorët e të dy vendeve në NATO. Banda ceremoniale e NATO-s do të luajë fillimisht himnet kombëtare të Shqipërisë dhe Kroacisë dhe himnin e NATO-s. Këtë ceremoni do ta përshëndesë Sekretari i Përgjithshëm i NATO-s, Japp de Hoop Scheffer dhe më pas, do të mbajnë fjalët e tyre të rastit kryeministri Berisha dhe kryeministri i Kroacisë, Sanader. Gjatë kësaj vizite, kryeministri do të ketë takime dhe bisedime me personalitete të pranishme në këtë ceremoni. Ngritja e flamurit shqiptar, i cili do të renditet i pari në rreshtin e flamujve të vendeve më të fuqishme të globit, përbën aktin më solemn të vlerësimit dhe krnarisë për çdo qytetar shqiptar. Shqipëria u bë zyrtarisht anëtare e Aleancës së Atlantikut të Veriut në Samitin e Strasburg-Kehlit, pasi 26 vendet anëtare brenda një kohe rekord ratifikuan Protokollin e Anëtarësimit, që u firmos në muajin korrik të vitit të kaluar. Tre ditë më parë, në samitin jubilar të 60-vjetorit të Aleancës, Presidenti i SHBA-së Barack Obama, i vlerësoi si të jashtëzakonshme reformat e ndërmarra nga qeveria shqiptare dhe ajo kroate. Të njëjtin qëndrim mbajtën të gjithë drejtuesit e vendeve anëtare, të cilët vlerësuan se anëtarësimi ishte plotësisht meritë e Shqipërisë dhe Kroacisë dhe jo një dhuratë e Aleancës. Kryeministri Berisha e vlerësoi momentin e anëtarësimit të vendit në NATO si ngjarjen më madhore të kombit pas shpalljes së Pavarësisë. Dy ditë më parë, kryeqyteti shqiptar, në një atmosferë entuziasmi të pamasë festoi anëtarësimin e vendit në Aleancën politiko-ushtarake më të fuqishme të globit. Qindra mijëra qytetarë u mblodhën në sheshin qëndror të Tiranës, për të ndarë së bashku gëzimin për këtë arritje të madhe kombëtare. Kreu i qeverisë, duke përshëndetur qytetarët e mbledhur për të celebruar këtë ngjarje, tha se përfaqësuesit shqiptarë u ulën për herë të parë si anëtarë me të drejta të plota përkrah me Presidentin e SHBA-së, Barack Obama, Presidentin e Francës, Nikola Sarkozi, Kancelaren e Gjermanisë, Angela Merkel dhe të gjithë drejtuesit e Aleancës. "Dje, ju dhe përfaqësuesit tuaj më të lartë, u ulën për herë të parë në historinë e këtij kombi në Samitin e Strasburgut si të barabartë me liderët e vendeve anëtare të Aleancës së Atlantikut të Veriut. Prandaj sot, urimi im për ju, qytetarët e Tiranës dhe të mbarë Shqipërisë, por edhe për shqiptarët kudo që janë sot, është: Gëzuar ditën e madhe të krenarisë kombëtare, ditën e bardhë të mrekullisë së lirisë", u tha Berisha mbi 150 mijë qytetarëve të Tiranës të mbledhur në Sheshin "Skënderbej". Ai tha se anëtarësimi në NATO shënon sigurinë e lirive të qytetarëve shqiptarë dhe të gjitha gjeneratave që vijnë. Ky anëtarësim, tha kreu i ekzekutivit, shënon fundin e një udhëtimi shekullor; epik në qëndresë, legjendë në dhimbje, sakrificash dhe vuajtjesh më të mëdha se të çdo kombi tjetër. Berisha e cilësoi këtë ngjarje si një fillim të ri të ndritur, në të cilin shqiptarët do të kenë NATO-n mburojë të lirive të tyre, epokë në të cilën ata do të mund të ndërtojnë të lirë, të ardhmen e munguar dhe të ardhmen që meritojnë. Ndërkohë, vetë qytetarët shprehen se ndihen krenarë për këtë arritje madhore, duke nënvizuar se janë optimistë për një integrim të shpejtë edhe në BE.