Federata Panshqiptare "Vatra" ftoi dje të gjithë qytetarët shqiptarë që më 28 qershor të votojnë për Partinë Demokratike, duke e konsideruar këtë si një votë për kombin dhe ecjen e tij në rrugën e zhvillimit e modernizimit.
"Vota për PD sot është votë për realizimin e aspiratave kombëtare", thuhet në një deklaratë për shtyp të Federatës Panshqiptare me qendër në Nju Jork, e cila shprehet se po ndjek me shumë vëmendje përgatitjet për zgjedhjet e 28 qershorit, që do të jenë një ndër hapat më të rëndësishëm për ecurinë e zhvillimeve demokratike në Shqipëri.
"U bëjmë thirrje vëllazërore gjithë shqiptarëve me të drejtë vote të marrin pjesë masivisht në këto zgjedhje dhe me dinjitet e ndjenjë të lartë qytetarie të mbështesin ecjen e sigurt të Shqipërisë drejt përparimit dhe integrimit të plotë të vendit", thuhet në deklaratën e Vatrës. Ky proces, vijohet më tej në deklaratë, është i pari për Shqipërinë si një anëtare e NATO-s, dhe si i tillë duhet të pasqyrojë dhe të justifikojë besimin që Aleanca më e madhe e globit i dha Shqipërisë.
Federata Panshqiptare vlerëson se në katër vitet e shkuara, Shqipëria ka njohur arritje historike - arritje që janë rezultat i qeverisjes me vizion kombëtar e përkushtim të kryeministrit Berisha. "Anëtarësimi në NATO dhe ritmet e shpejta drejt anëtarësimit në BE janë dëshmi e vlerësimit të reformave të guximshme të asaj qeverie. Lufta pa kompromis kundër krimit të organizuar dhe korrupsionit, një situatë e shëndetshme dhe e qendrueshme ekomonike në një kohë krize ekonomike botërore, rritje e mirëqenies, vepra të rëndësisë kombëtare si rruga Durrës-Prishtinë janë fakte të pamohueshme të vërtetuara nga shumë miq të Shqipërisë dhe në mënyrë të veçantë të vlerësuara e të mbështetura nga SHBA. Këto fakte përbëjnë arsye bindëse që ne sot t'i kërkojmë çdo qytetari shqiptar që në datën 28 qershor, me votën e tij të garantojë vazhdimësinë e vendit dhe të kombit shqiptar në këtë rrugë të sigurt suksesi", nënvizon më tej deklaratën e saj Federata Vatra.
Më tej, drejtuesit e kësaj organizate panshqiptare ftojnë çdo qytetar të Shqipërisë që 28 qershorin ta kthejnë në një plebishit demokratik për t'i siguruar atdheut zhvillim dhe për katër vitet e ardhshme. "Në veçanti, u bëjmë thirrje mbështetësve të opozitës të gjejnë dinjitetin e kurajon ta hedhin votën atje ku e dikton interesi kombëtar, pa rënë pre e dëshirave për përfitime personale. 'Vatra' kërkon nga të gjithë votuesit të respektojnë me fanatizëm standardet demokratike të zgjedhjeve dhe me votën e tyre të lartësojnë nderin e Shqipërisë", nënvizohet më tej në deklaratën e Federatës Panshqiptare "Vatra".