VOAL - Online Zëri i Shqiptarëve - EDI RAMA - SHQIPTARËT, TË VETMIT ME DY GRUPE ARTISTËSH NË BIENALEN E VENECIAS

Kryeministri Edi Rama ndodhet prej dy ditësh në Itali, për të marrë pjesë në Bienalen e Venecias. Sot kryeministri ka vizituar pavijonin e Shqipërisë dhe atë të Kosovës, ku është njohur me prezantimet e artistëve shqiptarë.

Në pavijonin e Shqipërisë, kushtuar arkitekturës, titulluar "Monumente të Mundshëm Ardhmërisht të Parealizuara", u prezantuan punët e dy artistëve shqiptarë "Penthouse" (Shtesat), një seri pikturash nga Edi Hila dhe "The Column" (Kolona), video/instalacioni nga Adrian Paci.

Rama e konsideroi praninë e Shqipërisë në Bienale si prezantim i Shqipërisë tjetër, asaj të kulturës dhe të artit.

"Për ne, për mua si Kryeministër i një vendi, i cili nga larg shihet si një vend që gjeneron ankth, është një betejë shumë e rëndësishme, nga njëra anë, për të investuar më shumë në kulturë dhe nga ana tjetër, për të paraqitur këtë anën tjetër të vendit, që paraqet një pamje shumë rrezatuese dhe shumë tërheqëse, e përfaqësuar nga artistë vërtet të mëdhenj, jo vetëm në artin pamor, por edhe në muzikë dhe në të gjitha sferat e krijimtarisë", u shpreh Kryeministri.

I entuziazmuar, kryeministri Rama vizitoi edhe pavijonin e Kosovës në Bienale. Ai një vlerësim e dha edhe në profilin e tij në rrjetin social Facebook, ku është shprehur krenar me pjesëmarrjen e Kosovës.

Në profilin e tij në Facebook, Rama e ka publikuar si foto të ditës, një fotografi nga pavijoni i Kosovës në Venedik.

"PHOTO OF THE DAY - Kosova në Bienalen e Venecias", ka shkruar Rama në Facebook. E në ditën e parë të hapjes së Bienales së Venecias, Rama gjithashtu shkroi për pavijonin e Kosovës, me fjalët: "Në Arsenale edhe Pavijoni i Kosovës. Shqiptarët, të vetmit me dy grupe artistësh :-)".

Ndërkohë Rama ka shkëmbyer vlerësime edhe me artistin dhe kuratorin Gëzim Paçarizi, i cili i foli kryeministrit për idenë dhe elementet qendrore të pavijonit.

"Është një kullë nga shkëmbi, nga elementi popullor më i vjetër u yni, autentik, i cili mban të njëjtin emër me shkëmbin, gurin, shkëmbi edhe ulësja. Është element shumë i vjetër i arkitekturës sonë dhe ne e kemi transformuar në një shprehje moderne bashkëkohore, në një kullë rrethore. Pjesa tjetër e ekspozitës sonë prezanto het si një mur i kartëpostaleve. Janë 360 kartëpostale të ndryshme, të cilat tregojnë arkitekturën kosovare që nga viti 1863 e deri sot", u shpreh kuratori Gëzim Paçarizi.

Pavijoni i Shqipërisë u kurua nga Beyond Entropy Europe, fitues i "Luanit të Artë" në Bienalen e Artit, vitin e kaluar në Venecia. Ndërkohë edhe ministrja e Kulturës Mirela Kumabaro shprehu krenarinë për suksesin e artistëve shqiptarë dhe paraqitjen dinjitoze të pavijonit të Shqipërisë dhe Kosovës.