Voal-oline - Gazeta zvicerane Blick ia kushton sot pjesën më të madhe të faqeve
20-21 boksierit shqiptarozviceran Arlond Gjergjaj.
Sot një javë, shkruan Blick, në Manheim, kampioni i shumëfishtë botëror i
peshave të rënda, boksieri Vladimir Klitshko (37 vjeçar), mbron titujt e tij
përballë sfidantit italogjerman Francesco Pianeta (28 vjeçar).
Si shumë herë më parë Klitschko ka pushuar në hotelin e tij të parapëlqyer në
Kitzbühel. Nga kjo adresë ai ka dërguar në Prateln të Bazel Landit një ftesë
boksierit shqiptarozviceran me prejardhje nga Kosova, Arnold Gjergjaj (28
vjeçar), si partner stërvitor në prag të ndeshjes që ai zhvillon të shtunën e
ardhshme.
Traineri i Arnold Gjergjajt, Angelo Gallina, e përshkruan me emocion ardhjen e
ftesës dhe seancat e para stërvitore të tij me kampionin botëror. "Kobra,
thotë ai duke folur me emrin e artit për Gjergjajn, pati shansin të përballet
me Çekiçin e Hekurt," duke folur me emrin e artit për Klitschkon.
"Për mua ishte një përvojë e hatashme," thotë Arnlodi, "u kënaqa
pa masë."
Kjo stërvitje për boksierin profesionist, me 21 ndeshje, të gjitha të fituara,
ishte një tjetër hap i vogël drejt ëndrrës së tij - të luajë kundër Klitschkos
për titullin botëror, shkruan më tej Blick në numrin e sotëm. "Tash unë e
di se ku ndodhem dhe çfarë më duhet të bëj në të ardhmen."
Angelo Gallina mendon se në vitin 2014, më së hershmi, Arnold Gjergjaj, do të
jetë në gjendje të sfidojë Klitschkon. Por deri atëherë i duhet shumë punë. Më
11 maj në Kazinonë e Madhe të Bazelit, Arnold Gjergjaj do të ndeshet me
argjentinasin Nelson Dominguez (35 vjeçar).