SHËTITJE NËPËR SHI Nga VEHBI SKËNDERI
E Mërkurë, 03.26.2014, 08:23am (GMT+1)
Teksa po ecim nëpër shi, uroj që rruga jonë të zgjatë e të zgjatë Sa këta litarë shiu të pamatë.
Çapemi pa u ngutur. Retë mbushur përplot turren mbi ne prej qiejve E prej maleve.
A mund të ishte kaq i këndshëm ky shi Po të mos ta kisha hedhur xhaketën time krahëve?
Notojmë nëpër shi, apo në Drin, në Gand, në Danub a në Rhin. Apo mes lotëve që bien pa pushim prej puthjeve të kuqrremta. Çapemi të trishtuar nëpër shi Si dy bohemë që ua ka kthyer era fare telat e ombrellës.
A do të ishte dot Ky koncert-shiu pa frymëmarrjen tënde kaq delikat me mua e kaq përkëdhelës.
Kalojmë nëpër shi si shtërgë të vonuar. Përsipër nesh kupola e hirtë e mjergull. A do të ishte ky shi kaq i hijshëm Po të mos ta hidhja krahun rreth qafës si mjergull.
Kalojmë nëpër shi si dy bohemë që s'dinë nga janë nisur dhe s'dinë ku do të venë. Miliona kalimtarë çapen (me ne sëtoku) nën male me dilema: Na pret hapësira e lirë a na presin prangat?
Zotërinj! Ju mbushini kasafortat dengaz me flori. Ne të dy me perla shiu Po i mbushim bankat.
Reinach, 5 prill 2001 - Nga libri "Zvicra Shqipëria ime", Prishtinë 2004
VEHBI SKËNDERI
|