Në ditën e festës së pavarësisë së Shqipërisë, Donna Colorio, profesore në Quinsigmond Community College me origjinë shqiptare rikonfirmohet fituese pas rinumërimit me dorë të votave të zgjedhjeve të 8 nëntorit 2011 si anëtare e komitetit të shkollave të qytetit Worcester (USTER) të shtetit Massachusetts në SHBA.
Me vetëm 2 vota diferencë pas kandidatit të vendit të parë nga numërimi elektronik duke respektuar procedurën zgjedhore Colorio kërkoi rinumërimin me dorë të 19 mijë e 243 votave dhe fitoi me 33 vota më shumë edhe pse kandidon për herë të parë.
Çuditërisht, Donna Colorio bëhet e dyta grua shqiptare në qeverinë lokale që fiton nga numërimi i votave me dorë.
Kështu, pas Konstantina Lukës me origjinë shqiptare, ish kryetare e bashkisë së qytetit (2008-2010) e cila u rikonfirmua 4 vjet më parë me rinumërimin e votave me dorë, Donna Colorio bëhet gruaja e dytë me origjinë shqiptare në qeverisjen lokale të qytetit Worcester,Massachusetts duke i dhënë kështu më shumë mbështetje edhe komunitetit shqiptar.
Colorio është vajza e Mary Colorio, pronare shqiptare e kompanisë Dimitria Delights që punëson shqiptarë që nga hapja e biznesit me 1972 duke ndihmuar më shumë për integrimin e familjeve të tyre në shoqërinë amerikane.