VOAL - Online Zëri i Shqiptarëve - SELANIK - NJË NISMË E RE PËR MËSIMIN E GJUHËS SHQIPE

Një tjetër cikël mësimor i mësimit të gjuhës shqipe për fëmijët e emigrantëve shqiptarë është çelur në qytetin e Selanikut.

Këtë herë në lagjen Stavrupoli, ku jetojnë një numër i madh shqiptarësh, Shkolla fillore publike nr 1 hapi dyert, që fëmijët e tyre të mësojnë gjuhën e nënës.

Ishte një iniciativë e Shoqatës shqiptaro-greke të punëtorëve dhe miqve të Selanikut "Progresi", drejtuar nga Theodhori Miho, e cila u mbështet nga kryetari i Bashkisë së Stavrupolit, Diamantis Papadhopulos dhe drejtoria e shkollës nr 1 në këtë lagje.

Në përurimin e orës së parë të mësimit merrnin pjesë drejtues të shoqatës "Progresi", kreu i bashkisë së Stavrupolit, Diamantis Papadhopulos, përfaqësuesi i PS për emigracionin Artur Porpollogu, përfaqësues nga konsullata shqiptare në Selanik dhe nga shoqatat shqiptare në Selanik.

Në ditën e parë u regjistruan 30 nxënës, me shpresën se interesi dhe numri i tyre do të rritet në të ardhmen.

Mësimet do të zhvillohen falas, një herë në javë, nga mësuesit shqiptarë Engjellush Llëngaj, Eva Paloka, Marjeta Llojko, Rovena Spiridhi dhe Anesti Mulliri.

Baza materiale dhe librat u siguruan nga kandidati për deputet i PS në zgjedhje, përfaqësues i emigracionit shqiptar në Greqi. Artur Porpollogu

Kreu i Bashkisë së Stavrupolit, z.Papadhopulos u shpreh i gëzuar që hapja e këtij cikli mësimor për fëmijët shqiptarë u bë realitet, duke theksuar, se ata duhet të njohin gjuhën dhe kulturën shqipe po aq mirë sa atë të vendit ku kanë lindur dhe po rriten.

Ndërkaq, ka 12 vjet që në Selanik zhvillohen cikle të mësimit të gjuhës shqipe, organizuar nga Shoqata e Emigrantëve Shqiptarë "Nënë Tereza", ku aktualisht rreth 120 nxënës marrin mësime në mjediset e Universitetit "Aristoteli" nga mësues shqiptarë. (bw)