Stina e bukur e pranverës ka "trokitur" edhe në Tiranën tonë. Këtë ndjenjë të
këndshme e përjeton menjëherë, sapo të dalësh në qendër të kryeqytetit. Ngado
që të hedhësh sytë, të bien në sy gjelbërimi dhe lulet shumëngjyrëshe. Por, më
së shumti, këtë gjë e dallon edhe në pamjet e fytyrës së njerëzve. Ata
udhëtojnë në makinat e tyre, por dhe më këmbë. Biesedojnë me njëri-tjetrin ose
meditojnë me kënaqësi për stinën, që ka ardhur. Se, mjaft më, patëm të ftoftë e
shira të rrëmbyera, të cilat na shkaktuan edhe dëme.
Sapo kam dalë nga lokali me emrin kuptimplotë "Ulqini", ku pimmë kafe me
kolegun e rinisë dhe të jetës, juristin konispolit, Agim Ibrahimi. Pastaj marr
udhën për në Bibliotekën Kombëtare. Aty mësoj se, pas pak, do tës bëhej
përurimi i një libri të ri, kushtuar Ali Pashë Tepelenës. Ndërsa takoj
studiuesin e botuesin Isa Halailaj, "Mësues i merituar". Si atij dhe "Mësuesit
të Popullit" Shefqet_Hoxha, të dy nga rrethi i Kukësit, u lë nga një libër të
albanologut suedez, Ullmar Kvik. Një libër të tillë i kam lënë edhe krijuesit
Naum Kule, i cili boton revistën periodike "Myzeqeja". Përmes mikut të tij,
Sabri Maxhani-Novosella, autori na dërgoi afër 100 kopje të librit të tij, "Më
shumë heroizma, se sa grurë", përkthyer në gjuhën shqipe dhe botuar në Prishtinë.
Me porosi të veçantë të Ullmar Kvikut, kemi nisur t'i shpëndajmë dhuratë ata
libra, nëpër biblioteka dhe te miq e kolegë, studiues, arsimtarë, punonjës të
kulturës e shkencës etj. Për këtë arsye, përsëri takohem sot me kolegun e mikun
Viron Kona, shkrimtar i njohur. Prej këtij marr "˜listën" e bibliotekave dhe të
personave, të cilën e kemi hartuar së bashku dhe që do t'ua japim shuratë këtë
libër, nga albanologu suedez e mik i shqiptarëve.
Duke kaluar nëpër qendrën e kryeqytetit Tiranë, nuk e harroj "profesionon" tim
të dytë, atë të fotografit amator. Pra, e shkrepi aparatin për të fiksuar pamje sa më të bukura. Sidomos,
më tërheqin pemët e gjelbëruara dhe lulet aq të bukura, disa vendosur edhe në
vazo të vogla e varur në trungjet lastar të drurëve të ndryshëm. Ja, njëra
pamje është para Muzeut Historik Kombëtar, ku në festën e 100-vjetorit të
shpalljes së Pavarësisë pati aq shumë lëvizje e vizitorë. Ata shkonin aty për
të shikuar përkrenaren e Skënderbeut, ardhur për herë të pare në Shqipëri, nga
Vjena e Austrisë. Ndërsa në një sallë të Bibliotekës Kombatare ata panë
dorëshkrimin e dokumentit të parë të shqipes së shkruar, "Mesharin" e Gjon
Buzukut, por dhe vepra të vjetra të Budit, Bogdanit, Matrangës etj.
Më tej, i nisur me "shërbim" vetjak, shkoj në bibliotekën e Akademisë së
Shkencave. Aty dhuroj librin tim publicistik "Dorela" dhe librin më të ri, "Me
zëmër në vendlindje"(Shënime nga Suedia). Ashtu si në Bibliotekën Kombëtare, më
ankohen" se, tashmë, nuk kanë vend të lirë, për të mbajtur nga 5 kopje të
librave të rinj?!
Gjelbërimi më shoqëron edhe në mjedise të tjera të kryeqytetit, si për rreth
Bankës së Shtetit, në Këndin e Lodrave dhe në Parkun "Rinia" e përgjatë
Bulevardit "Dëshmorët e Kombit", deri në Parkun e Madh të Tiranës. Por
edhe kur kthehem për në stacionin e trenit, ku e kam vendbanimin tim. Para pak
ditësh, bashkë me kolegun V.Kona, këtu përcollëm për në Gostivar Sadulla
Zendelin-Daja, me banim tash afër 50 vjet në Suedi. Ai dërgoi në shtyp Fjalorin
shqip-suedisht, me 35.000 fjalë.
...Më ngjan se një pjesë të stinës së pranverës, me bukurinë e saj magjepëse, e
kam "marrë" me vete. Prandaj vendosa që këto ndjenja të bukura, pasqyruar edhe
përmes pak fotove, t'i ndaja me lexuesit e nderuar. Nuk di saktësisht, se të
kujt janë këto vargje, por tani më kujtohen ato: "Pranverë në natyrë, pranverë
në zemrat tona!"
Tiranë, 23 prill 2013
Në qendrën e kryeqytetit, ku duket edhe Pallati i Madh i Kulturës...
Në qendrën e kryqytetit para Muzeut Kombëtar
Këndi i lojërave, që pret fëmijë...
Në afërsi të Bankës së Shtetit...