"Procesi i anëtarësimit në Bashkimin Evropian është po aq i rëndësishëm sa edhe
vetë fakti i anëtarësimit në BE", ka thënë të enjten, ministrja e Integrimeve
Evropiane, Vlora Çitaku, në manifestimin e quajtur "Panairi i fëmijëve", me të
cilin u shënua 9 Maji - Dita e Evropës në sheshin "Nëna Terezë" në
Prishtinë.
Ministrja Çitaku ka shprehur bindjen se në momentin kur Kosova do të fillojë
procesin, me negocimin për Marrëveshjen e Stabilizim-Asocimit, vendi do të
vendoset në rrugën e gjatë, por siç ka thënë ajo, të pakthim, drejt integrimit
në Bashkimin Evropian.
"Do të jetë proces i gjatë. E rëndësishme është që ne të përqendrohemi në
reforma, të përqendrohemi në kryerjen e detyrave të shtëpisë, si detyrim ndaj
qytetarëve tanë, e jo si detyrim ndaj Komisionit Evropian. Integrimi nuk është
qëllim në vetvete. Integrimi evropian është një proces i brendshëm
transformimi, përmes së cilit, institucionet dhe shoqëria sendërtojnë vlerat
dhe parimet evropiane", ka theksuar Çitaku.
Ministrja Çitaku ka shtuar se Dita e Evropës, nuk duhet të shërbejë vetëm si
një ditë pushimi për njerëzit që e shënojnë atë, por edhe si një moment
reflektimi për të gjithë popujt e Ballkanit.
"‹"‹"Duhet të shërbejë si një moment reflektimi për atë ku kemi qenë, si Ballkan,
në vitet '90 dhe ku jemi sot. Është vetëm ideja e integrimit në Bashkimin
Evropian ajo që po e stimulon paqen, bashkë-ekzistencën dhe orientimin drejt së
ardhmes", ka shtuar Çitaku.
Për shënimin e Ditës së Evropës, janë organizuar një varg manifestimesh,
për të rritur dhe për fëmijë.
Kolegji Universitar "ISPE", të enjten ka publikuar rezultatin e
hulumtimit të opinionit publik me titull "Njohuritë e qytetarëve të Republikës
së Kosovës rreth Bashkimit Evropian". Siç thuhet në këtë publikim, rezultatet e
sondazhit kanë treguar që qytetarët e Kosovës kanë njohuri të kënaqshme për
Bashkimin Evropian.
Zhvillimi ekonomik i Kosovës, në opinionin kosovar, lidhet ngushtë me
anëtarësimin e vendit në Bashkimin Evropian. Ndërkaq, korrupsioni, zhvillimi
ekonomik, sundimi i ligjit, institucionet jostabile, vetë Bashkimi Evropian dhe
mosefikasiteti i institucioneve, janë disa nga arsyet që qytetarët dhe
studentët në Kosovë, mendojnë se janë faktorët kryesorë pse Kosova ende nuk
është pjesë e Bashkimit Evropian.
Blerta Begisholli, bashkë-prezantuese e hulumtimit, ka theksuar se një hulumtim
i tillë nuk është bërë më parë në Kosovë
"Në këtë hulumtim që e kemi bërë ne, shumica prej gjetjeve tona kanë qenë
befasuese, sepse qytetarët, në përgjithësi, kanë qenë të njohur me proceset e
Bashkimit Evropian dhe kjo është një befasi për të mirë. Por, në njërën nga
pyetjet, mund ta shihni se njohuritë nuk i kanë marrë nga mekanizmat që ofron
Qeveria jonë për qytetarët, por, në fakt, nga mediat. Shumica prej tyre,
sidomos moshat më të vjetra, i përcjellin lajmet dhe janë më në rrjedha me
ngjarjet", ka thënë Begisholli.
Njohësi i rrethanave integruese evropiane, Avni Mazreku, ka theksuar se
hulumtimi i studentëve të Kolegjit Universitar "ISPE", vë në dukje se
qytetarët janë mjaft mirë të informuar për performancat pozitive dhe negative,
si dhe për politikat e ndryshme sektoriale që ndërlidhen me proceset
integruese.
Megjithatë, ai ka theksuar se janë dy dimensione, ku mund të matet përparimi
ose ngecja e Kosovës në drejtim të integrimit në Bashkimin Evropian.
Sipas Mazrekut, mosnjohja e pavarësisë së Kosovës nga pesë vende anëtare të
Bashkimit Evropian, e dekompozon avancimin normal të Kosovës në procesin
integrues, pavarësisht përmbushjes së disa kritereve nga ana e Kosovës.
Dimensioni më i rëndësishëm, sipas Mazrekut, është puna dhe roli i
institucioneve përgjegjëse në Kosovë dhe shkalla e lartë e korrupsionit.
"Prandaj, këto dy, mendoj se janë pengesat kryesore për ecjen normale të
Kosovës në këtë proces. Prezenca e një shkalle të lartë të korrupsionit,
ashtu siç e tregon edhe hulumtimi - qytetarët e Kosovës kanë një opinion
në lidhje me këtë fenomen si problem që e pengon Kosovën në funksion të ecjes
së saj drejt anëtarësimit në Bashkimin Evropian, si dhe krimi i organizuar.
Krejt këto, në fakt, mund të konvertohen në një artikulim tjetër, ndoshta, që
mund të quhet si proces i sundimit të rendit dhe të ligjit", ka vlerësuar
Mazreku.
Ndryshe, në Ditën e Evropës, ka pasur edhe performanca, përmes së cilave janë
shprehur pakënaqësitë për, siç është thënë, një qeverisje të keqe, rritje të
korrupsionit dhe një ekonomie të dobët.
Performancën e tillë e ka organizuar Iniciativa për Progres, para objektit të
Qeverisë së Kosovës. Iniciativa për Progres, po ashtu, ka kërkuar nga
Qeveria e Kosovës që të hiqet nga festat zyrtare 9 Maji, Dita e Evropës.