Ish deputeti Mark Marku, pas shpalljes së listave për kandidatë për deputetë
nuk është shprehur aspak i çuditur me mos përfshirjen e tij, duke e justifikuar
me faktin se ka qenë një ndër zërat kritike ndaj Qeverisë. Pas zyrtarizimit të
listave, Mark Marku, i cili në vitin 2009 garoi në qarkun e Lezhës nën siglën e
PD-së, me plot bindje ka deklaruar se ishte në pritje të një vendimi të tillë,
por ai shpreh habi që kryeministri ka ndëshkuar edhe ata deputetë që e kanë
mbështetur verbërisht.
"Lista ka paradokse. Në lista nuk jemi si ne që në njëfarë mënyre i kemi
tërhequr veshin Qeverisë për disa mos funksionime dhe disa probleme që ka pasur
në funksionimin e Qeverisë, po ashtu në listë nuk janë gjithashtu edhe ata
anëtarë të komisionit të veshit po themi. Ndëshkohet modeli kritik, por është
ndëshkuar edhe modeli i kundërt, modeli që ka qenë shumë konformist dhe shumë i
zellshëm brenda PD, madje ka bërë edhe veprime që normalisht ndoshta nuk do
duheshin bërë. Në njëfarë mënyre ka një çorientim në çështjen listave",
deklaroi Marku.