GUSHT NË TIRANË Poezi të reja nga QAZIM SHEHU
E Shtunë, 08.16.2014, 06:07am (GMT+1)
GUSHT NË TIRANË
Ky diell humbet në vapë të gushtit dhe njerëzit ikin plazheve,
Pranë detit të freskët dhe hutimit të ëndrrave,
Qytetet zbrazen dhe bulevardet u ngjajnë gjuhëve që përqeshin
Heshtjen e zbrazët të qytetit ,sepse
Ky diell humbet në vapë të gushtit,
Dhe njerëzit i thithi deti me dallgë,
I cili e mbyt gabimisht ndonjë njeri,
Ashtu si gabimisht në rrugët e qytetit kryhet një vrasje
Ose nga qafa e ndonjë gruaje zhvatet një flori...
Dielli ndoshta për këtë më tepër
Mbi kokë si saç na rri...
VOSKOPOJË
Rrafshnaltë e lartë dhe pyje në kodrina,
Pisha si mjekër priftërinjsh të ngurosur në enigma,
Shtëpi me gurë të gdhendur dhe turistë nga çdo anë,
Një histori e re,
Ndoshta ajo më e drejta
Pa zjarrin që i rri pranë...
BURIMET E TUSHEMISHTIT
Burimet e Tushemishtit i ngjajnë gishtit,
Që dora e tokës nxjerr në sipërfaqe,
Ta lajë pakëz në liqen.
Burimet e Tushemishtit rrjedhin rrjedhin,
Pezmin e tokës në liqen derdhin.
Dhe liqeni pezmin mbledh, mbledh,
Në grykë të Strugës lumit Drin e herdh...
BORSALINO E LASGUSHIT
Më ngjau një çast se Lasgushi nuk kish mbi krye një barsolinë,
Po një mjellmë.
Nën këmbë një burim të thellë.
Cuci e tërhiqte nga këmbët mos binte në humbellë
Kaq vite poet i varfër e mbajti atë barsolinë,
Mbi krye një mjellmë,
Nën këmbë një minë.
Dhe vargu i poetit çante vetëtimë,
Në funde të liqenit
Ku vështrimi i të zakonshmëve nuk mbërrin....
QAZIM SHEHU
|