CIKËL POETIK NGA FASLLI HALITI
E Mërkurë, 10.15.2014, 11:28am (GMT+1)
FASLLI HALITI KUJTIM NGA NJË EKSKURSION
Migjenit për ditëlindje
Niset... Dyqind Kilometra rrufiti - Ndalet autobusi, shëmon.
Përpara Kalaja, liqeni, Shkodra. Buna si grua kaba Me bluzën e bruztë, Trupin duke dredhur, Futet në gjirin e detit, Bri bregut liqeni mërmërit. Shkodra! Kalaja plagët akoma mjekon.
Rrugët E Shkodrës. Këtu ka ecur Migjeni. Gjurmët e Migjenit Si fosile fiksuar mbi rrugë. Ja ku ka ecur Migjeni! Ja si ka ecur Migjeni!
Prapa, Bjeri, prapa! Shikoja ku këmbët i shkojnë, Shikoja ku këmbët i ndalin!- Migjeni ka shkelur kudo. Këmbët i ndalin, Në majën E malit.
Sa shumë Ka ecur Migjeni! Sa mirë ka ecur Migjeni!
Shkodër! Rrugët e tua pështill si rul. Dërgoja muzeut "Migjeni", Në rrugët e tua të incizuara, T'i shohin brezat gjurmët e viganit.
Brodha, Me gjurmët e Migjenit, Brodha nëpër rrugë,- Ja ktheva programin ekskursionit.
Shokët, Kur të vetëm më shikonin, Që bridhja serioz, vizitoja rrugët, Më quanin pa shije njeri. Dhe thoshin, pse rrugëve bëj vizita, Kur në Shkodër kishte Muzera dhe fabrika.
Shokët, Me shokët Poza bënin në sfonde antikash, Poza bënin përpara liqenit, bri Bunës, Kurse për vete unë, Përpara teatrit "Migjeni", Poza bëra me Migjenin. - Poza me Migjenin Bust.
Kthimi. Gota, Shporta, Servise, Sapunë "Venus"- Merr kujtime nga Shkodra, dikush. Dy gjurma mora, Shkula nga rruga,- Dy gjurma të Migjenit mora kujtim.
Në borsetën time kujtimi më i mirë!
1965
VARRI I MIGJENIT
Pllaka të thyera mermeri. Kjo thyerje lemeri Të dhemb Atdhe, Të ther, Shqipëri.
Kraharori i Atdheut copa - copa, Copa mermeri të thyera Të përbaltura, Me baltë Të zezë, Kockat e Atdheut Të zbardhura nga shirat dhe vapa Kryqe kishash të galvanizuara me diell, Gjysmëhëna xhamish të galvanizuara me hënë, Fasada kishash dhe xhamish të lyera me solucion serme, floriri Përndrisin zhelet e lypësve ditën e Pashkës e Fiter Bajramit, Ditën e Premtes së Zezë dhe natës së Kadrit, Përndritja s'është flori në duart e lypësit, Lypësi lyp lekë, Jo luks, Komoditet.
Kishat e xhamitë Të bëjnë sfidë ty, Migjen, E dinë që ti, Shkëlqimin e tyre fiktiv s'e honeps Përndritjen e tyre gri mbrapsht ua kthen.
Kryqet e kishave si çekanë mbi pllakat e thyera, Gjysmëhënat e xhamive çengela Mbi varrin tënd, Migjen Por Mbi kryqet Kambanoret, Mbi minaret xhuxhe E epërme, epike, Poema e mjerimit qëndron Për varriin e atit gjeni, poetikisht, me metafora, jo me çekanë e qysqi barbare, debaton...
2008
BORA
Bora Thau Veriun, Ngriu malësorët, malet, Ngriu gurrat, Thau lulet. Naimi shkroi
Lulet e reja të verës Mbi bardhësinë e ftohtë. Lulet ngrohën luginat, bjeshkët, malet Me prushin e rimave, metaforave, petaleve, Naimi Shkriu akujt, Borërat e maleve.
Migjeni Zuri të kollitet. Filloi të pështyjë gjak. Plagosi dëborën me gjak tuberkular. Pastaj Qëlloi... I ra me grusht Bardhësisë së zezë. Vrau bardhësinë vrasëse. Si mund të heshte Migjeni, Si mund të rrinte indiferent, i qetë Përballë një bardhësie vrasëse Që vret, Që vret, Që Vret ...
Shkurt 2012
MIGJENIT
Ka pasur plot xixa në kohën tënde, Migjen, Xixa dekorative Që s'u bën kurrë zjarr. Ti, Migjen, ishe dhe je zjarri
Që ngroh e ndriçon njerëzimin lakuriq botës mbarë....
2012
KËNDUAM NËN DHUNË
Kënduam Me porosira, Me tortura dhe dhunë? Ne Kënduam nën dhunë, Por jo me tortura Dhe dhunë, Sepse kënga s'del asesi nga dhuna, Kënga s'del nga me vezë të zjera në sqetulla, Apo duke të ngulur në thonj thumba dhe spica Nga dhuna del rënkimi Del britma.
Nga tortura, dhuna Del Ofshama, Por kurrën e kurrës kënga.
Trillime, Trillime, Trillime. Të gjitha trillime, këto! Me me vezë të ziera në sqetull Shkroi gjeniu Kadare? Me thumba, shkulje thonjësh Shkroi poeti furtunë, Fatos Arapi, Xhelozira, shpifje, cmira, të gjitha këto!
Me dhunë e hekur të skuqur këndoi i madhi Dritëro?
2010
FASLLI HALITI
|