VOAL - Online Zëri i Shqiptarëve - India: Kina një rrezik ushtarak më i madh se Pakistani

India përballet me një rrezik më të madh nga Kina sesa Pakistani, sepse Nju Delhi njeh shumë pak kapacitetet ushtarake të Pekinit, deklaroi shefi i forcave ajrore indiane në një intervistë të publikuar sot.
    Dy vendet me popullsinë më të madhe të botës zhvilluan në vitin 1962 një luftë të shkurtër, por brutale lidhur me kufirin prej 3,500 kilometrash ndërmjet tyre në Himalaje dhe të dyja palët akuzojnë njëra-tjetrën për pushtim të pjesëve të mëdha, por të pabanuara të këtij territori.
    India në të njëjtën kohë ka synuar vendosjen dhe ruajtjen e marrëdhënieve të ngushta me Shtetet e Bashkuara të Amerikës, duke shkaktuar shqetësimin e Kinës.
    Kina ka një ushtri pothuajse tre herë më të madhe se ajo e Pakistanit, sipas statistikave zyrtare, por është mosnjohja e fuqisë ushtarake të Kinës ajo që është shqetësuese, deklaroi shefi i forcave ajrore indiane, Fali Homi Major.
     "Ne njohim shumë pak kapacitetet aktuale dhe profesionalizmin e ushtrisë kineze", deklaroi Major në një intervistë për gazetën "Hindustan Times".
    "Padyshim, kinezët janë një kërcënim më i madh", vlerësoi ai.
    India dhe Pakistani kanë zhvilluar tre luftëra ndërmjet tyre që pas fitores së pavarësisë në vitin 1947 dhe tensionet midis dy fqinjëve bërthamorë arritën kulmin pas sulmeve terroriste në Mumbai nëntorin e kaluar, ku humbën jetën 166 persona. ATSH-Reuters.
    Megjithatë, India dhe Kina kanë nënshkruar një traktat për ruajtjen e "paqes dhe qetësisë" përgjatë kufirit të tyre të dikutueshëm dhe kanë rënë dakord për gjetjen e një zgjidhjeje politike, por bisedimet për këtë çështje nuk kanë shënuar asnjë progres ndryshe nga forcimi i marrëdhënieve të biznesit midis dy ekonomive të mëdha në zhvillim të shpejtë.  /ATSH-Reuters/ -