Udhëheqësit
e NATO-s miratuan dërgimin e pajisjeve ushtarake në Europën Lindore, si
një mjet i mundshëm frenimi ndaj lëvizjeve të mëtejshme agresive të
Rusisë. Ata ranë dakord gjithashtu të krijojnë një forcë të reagimit të
shpejtë me trupa të aleancës për t'iu përgjigjur krizave.
Sekretari i Përgjithshëm i NATO-s Anders Fogh
Rasmusen e shpalli "Operacionin Spearhead" sot, ndërkohë që takimi
dyditor i nivelit të lartë po merr fund në Uells të Britanisë. Ai tha se
Polonia, Rumania dhe vendet baltike kanë ofruar të ngrejnë një
strukturë të posaçme për depozitimin e pajisjeve ushtarake.
Kryeministri David Cameron tha se Britania do të kontribuojë me 3.500
vetë për forcën e reagimit të shpejtë. Ai tha se NATO-ja duhet të rrisë
aftësitë e saj për t'u përballur me sfidat në Evropë.
Presidenti amerikan Barak Obama pritet të flasë sot për çështjet me të cilat përballet NATO-ja.
Udhëheqësit e NATO-s diskutuan edhe për sanksionet e mundshme të
mëtejshme kundër Rusisë pasi u bë e qartë shkalla e përfshirjes së saj
ushtarake në mbështetetje të separatistëve në Ukrainë. Një tjetër pikë e
rëndësishme në rendin e ditës ishte përballja me kërcënimin që përbën
për të gjitha vendet grupi radikal militant që tani e quan veten Shteti
Islamik, i cili thotë se synon të zgjerojë operacionet përtej
territoreve që kontrollon në veri të Irakut dhe në Siri.
Po sot, Sekretari i Jashtëm britanik Phillip Hammond tha se Perëndimi
nuk do t'i ndryshojë planet për sanksionet kundër Rusisë, por shtoi se
ato mund të hiqen në varësi nga rezultati i bisedimeve të sotme të paqes
në Minsk të Bjellorusisë.