VOAL - Online Zëri i Shqiptarëve - ALEKSANDËR ARVIZU - EKONOMIA DHE KORRUPSIONI ISHIN MË KEQ NGA SA MENDOHEJ, DUHEN ARRESTIME, HETIME DHE DËNIME NDAJ ZYRTARËVE TË LARTË

Ambasadori i SHBA-ve në Shqipëri, Aleksandër Arvizu, e përshkroi si shumë të vështrë situatën ekonomike të Shqipërisë, pas zbulimit të shumë borxheve dhe pagesave të prapambetura nga qeveria e mëprshme. Ambasadori Arvizu tha se ekonomia dhe korrupsioni në Shqipëri nga të dhënat e fundit doli se një vit më parë ishin shumë keq nga sa mendohej. Ai edhe një herë bëri thirrje për bashkëpunim mes pozitës dhe opozitës lidhur me reformat kryesore që ka nevojë vendi.

Ambasadori amerikan tha mbrëmë se ekonomia dhe korrupsioni në Shqipëri ishin më keq nga sa dihej një vit më parë. I ftuar për një bisedë në televizionin Klan, ambasadori Arvizu pohoi se SHBA dëshirojnë që qeveria Rama-Meta ta çojnë vendin përpara dhe të përparojnë në integrimin europian. Ai tha se kjo qeveri dhe ky koalicion mori mandat të fuqishëm në 23 qershor. "Kjo pasqyron dëshirën e popullit për ndryshim, për një drejtim të ri, por kjo është edhe një ngarkesë e madhe për këtë qeveri, sepse pritshmëritë janë shumë më të larta. kjo qeveri trashëgoi një situatë ekonomike shumë të vështirë nga ana fiskale dhe nga ana e buxhetit" - tha ai.

"Ka shumë detyrime të prapambetura për shërbimet e papaguara, ripagimi i tvsh-së etj..., është një shifër e jashtëzakonshme, shumë më e madhe nga çfarë besohej në fillim. Kërkesa e brendshme është shumë e sheshtë. Dhe kjo sjell probleme në konsum dhe në investime" - pohoi ambasadori amerikan në Tiranë.

Sipas tij, edhe niveli i korrupsionit është shumë më i madh. "Niveli i korrupsionit, me çfarë dihet tani, ishte një vit më parë më keq se sa mendohej. Gjithmonë mendohej se ka një nivel korrupsioni, por nga informacionet e fundit del se masa e korrupsionit më parë ishte më e thellë, më e përhapur se sa e kishim menduar ne" - tha ai. Një mënyrë efikase për ta luftuar korrupsionin, sipas tij, janë arrestimet, hetimet dhe dënimet nga gjykata deri në fund të procesit gjyqësor ndaj zyrtarëve të lartë. "Ku ka shenja për korrupsioon sistematik dhe të përhapur qeveria është e detyruar t'i dorëzojë dokumentat në zyrën e prokurorit" - tha ambasadori Arvizu.

Ai foli me shqetësim edhe për situatën e rendit publik. "Jemi të shqetësuar për rendin publik. Kam mësuar edhe fjalën "tritol", një term shumë popullor së fundi... ishte një fjalë që nuk e dija më parë. është një çështje që i shqetëson të gjithë, qeverinë dhe çdo qytetar shqiptar. Mendoj se ka shumë arsye që ndikojnë; njëra është gjendja ekonomike, ndryshimet në policinë e shtetit dhe në sistemin gjyqësor" - shtoi zoti Arvizu. Nga ana tjetër, ai tha se në javët e fundit policia ka shënuar disa arritje të mëdha sa i takon arrestimeve, dhe sipas tij, nevojitet një vlerësim i balancuar për çështjen e rendit, sepse policia po reagon përballë ngjarjeve.

Ambasadori Arvizu i kushtoi një pjesë të veçantë në bisedë edhe kompromisit mes pozitës dhe opozitës, duke e vlerësuar si një kërkesë kryesore të jetës në Shqipëri. Sipas tij, një pjesë e politikanëve e mendojnë kompromisin si një formë nënshtrimi, por në vërtetë marrëveshja tregon forcën e palëve. Forcat kryesore politike në Tiranë kanë marrëdhënie të acarruara dhe vazhdimisht shkëmbejnë akuza për çështje si rendi publik, vështirësitë ekonomike, shkurtimet në administratë, ndërsa marrëveshjet dhe bashkëpunimi midis tyre kërkohen nga opinoni publik dhe nga BE si një mënyrë për t'u integruar dhe për t'u zhvilluar.