VOAL - Online Zëri i Shqiptarëve - DËSHMITARI A - HASHIM THAÇI KA URDHËRUAR VRASJEN E SPIUNËVE, SYLEJAMN SELIMI THA SE DO TË JEMI TË SIGURTË EDHE NËSE FITON SERBIA

Më tutje gjatë dëshmisë së tij, duke vazhduar t'u përgjigjej pyetjeve të Gregory Guy Smith-it, "Dëshmitari A", tha se Hashim Thaçi e mësonte Sylejman Selimin se si të vepronte.

Dëshmitari A e konfirmoi atë që e kishte thënë më herët se "mësues i Sylejman Selimit ishte Hashim Thaçi".

"Hashim Thaçi i ka dhënë urdhra [Sylejman Selimit]për me i vra këta njerëz, ku një gjë të tillë është duke e bërë ende", tha dëshmitari.

Pastaj Guy Smith, avokati i Sylejman Selimit e përfundoi marrjen në pyetje të dëshmitarit.

Dëshmitari, i pyetur nga kryetari i trupit gjykues Darius Silicki më pas përshkroi dhomën e qendrës së ndalimit në Likovc ku u keqtrajtua, duke thënë se aty në atë dhomë i pa dhjetë të akuzuarit e këtij procesi.

Ai tregoi se këta persona i njihte më herët, prandaj nuk e kishte vështirë t'i identifikonte.

Dëshmitari A: Sylejman Selimi më Tha se i Paguan Amerika për t'i Vrarë Spiunët

Në gjykimin për krime lufte të Grupit "Drenica 2", "Dëshmitari A" duke iu përgjigjur pyetjeve të Gregory Guy Smithit, avokatit të Sylejman Selimit tha se katër pjesëtarë të UÇK-së i kanë thënë që Amerika i paguan ata për t'i vrarë spiunët.

Këtë deklaratë "Dëshmitari A" e kishte dhënë më 11 gusht. Gregory Guy Smith kërkoi të dijë nëse kjo është e vërtetë.

Këtu në gjykatë keni thënë se personat të cilët më rrihnin siç pretendoni ju në Likovc kanë thënë se janë të paguar nga Amerika për t'i vrarë spiunët. A keni thënë kështu?, pyeti avokati i Sylejmna Selimit.

"Po, zotëri", u përgjigj shkurt dëshmitari.

Kush ua ka thënë këtë?, shtroi pyetjen e dytë për këtë çështje Gregory Guy Smith

"M'i kanë thënë Sylejman Selimi, Hysni Thaçi, Zeqir Demaku dhe Jahir Demaku. Gjithashtu më kanë thënë se i marrin nga 500 marka gjermane në muaj për me i vra spiunët", tha Dëshmitari A.

Dëshmitari tregoi se Sylejman Selimi dhe tre të tjerët e UÇK-së, i kanë thënë se për vete do të jenë të sigurt edhe nëse luftën e fiton Serbia, pasi në atë rast do t'i dërgonë për të jetuar në Gjenevë.

Në fillim të seancës Gregory Guy Smith u ankua se nuk mund t'i shtrojë pyetje dëshmitarit, ngase nuk e di se ku ka mbetur, pasi nuk e ka procesverbalin e seancës së kaluar.

Kryetari i trupit gjykues Darius Silicki urdhëroi që procesverbali të shtypet dhe t'u dorëzohet palëve./kallxo.com/