VJOSA OSMANI KËRKON DEMOKRATIZIM TË LDK-së, TË ZBATOHET PARIMI 1 ANËTAR, 1 VOTË
E Shtunë, 01.10.2015, 08:44am (GMT+1)
Deputetja e LDK-së Vjosa Osmani ka kërkuar që zgjedhjet brenda LDK-së të funksionojnë sipas sistemit një anëtar një votë.
Ajo në një postim në Facebook ka shkruar se "Duhet të jemi të vetëdijshëm, megjithatë, që përderisa nuk vendoset sistemi "˜një anëtar një votë', sistem ky që aplikohet në partitë që kanë demokraci të brendshme të zhvilluar, nuk do të mund të flasim për respektim të drejtë të vullnetit të anëtarësisë së LDK-së".
Lexojeni postimin e Osmanit në Facebook:
Sot Lidhja Demokratike e Kosovës shpalli zgjedhjet e brendshme, të cilat do të fillojnë me 10 mars dhe do të përfundojnë në fund të muajit maj kur edhe pritet të mbahet Kuvendi i 8-të zgjedhor. Të gjitha organet e LDK-së do të duhej që synim kryesor të kenë që nëpërmjet këtij procesi t'a fuqizojnë LDK-në në mënyrë që ajo të rikthehet si parti e parë në vend. Freskimi me gjenerata të reja, me profesione dhe ide të reja, të cilëve do t'u jepet hapësirë në vendimmarrje duhet të jetë prioritet. Për më tepër, degët që janë treguar të pasuksesshme dhe kanë shënuar humbje të njëpasnjëshme, apo nuk e kanë rritë votën në masë të rëndësishme, duhet të marrin përgjegjësi dhe këto degë duhet të rigjenerohen në mënyrë që njerëz dinamikë që përqafojnë programin e LDK-së dhe mund t'a rrisin votën për LDK-në të marrin përsipër udhëheqjen e tyre. Kjo mund të arrihet vetëm me një proces sa më gjithëpërfshirës, të lirë dhe demokratik, pa imponime e pa ndikime në vullnetin e pjesëmarrësve dhe me pjesëmarrje masive të anëtarësisë. Duhet të jemi të vetëdijshëm, megjithatë, që përderisa nuk vendoset sistemi "˜një anëtar një votë', sistem ky që aplikohet në partitë që kanë demokraci të brendshme të zhvilluar, nuk do të mund të flasim për respektim të drejtë të vullnetit të anëtarësisë së LDK-së. Ky sistem, i aplikuar për disa dekada me radhë në shumë parti anëtare të EPP-së si proces më demokratik, nuk është i paarritshëm dhe s'ka arsye t'i frikësohemi atij, e sidomos tani kur pritet të përfundojë procesi i regjistrimit të anëtarësisë së LDK-së. Duhet, thjeshtë, vullnet për t'a bërë.
www.voal-online.ch
|