VOAL - Online Zëri i Shqiptarëve - PROKURORIA - JA SI I ZUMË NË GRACKË DOSHIN DHE FRROKUN, PASTAJ VENDOSËM T'I ARRESTOJMË

Prokuroria e Përgjithshme i drejtoi Kuvendit një raport me 7 faqe, ku argumentonte pse kërkonte arrestimin e të dy deputetëve Tom Doshi dhe Mark Frroku, ndërsa kishin inskenuar atentatin nga "vrasësi" i paguar Durim Bami.

Sipas argumenteve të organit të akuzës, në raportin që dje e kanë pasur në dorë edhe të gjithë anëtarët e Këshillit të Mandateve dhe vetë të dyshuarit, shpjegohen përgjegjësitë e secilit prej të akuzuarve.

Në dokument thuhet se "ka qenë nipi i deputetit Tom Doshi, i cili e ka prezantuar me Durim Bamin". Pra deputeti e ka njohur 36-vjeçarin nëpërmjet nipit të tij dhe më pas e ka detyruar të japë dëshminë e regjistruar në video.

Për këtë shkak ndaj Doshit janë ngritur 3 akuza, "kallëzim i rremë", "deklarim i rremë para prokurorit" dhe "kanosja për deklaratë të rremë". Sipas Prokurorisë, Doshi ka dhënë deklaratë të rreme para prokurorit për atentatin që rezultoi i sajuar.

Bami akuzohet se është përfshirë në këtë situatë, megjithëse me dëshminë e tij ndihmoi hetimet.

Por akuza më e rëndë ndaj Bamit është fakti se ai ka pasur njohje me deputetin Mark Frroku dhe në dëshmi e ka mohuar. Gjithashtu deputeti Mark Frroku akuzohet për deklaratë të rreme në Prokurori, pasi ka thënë se nuk e njeh Durim Bamin, por nga dëshmitë, fotot dhe përgjimet e kryera rezulton se ai e njeh të arrestuarin.

"Qëndrimi i deputetit Frroku u kundërshtua nga kamerierët e lokalit "Antika" në pronësi të Tom Doshit, të cilët kanë deklaruar se kanë parë ulur në tavolinë disa herë deputetin Frroku, bashkë me Doshin dhe Bamin".

Prokuroria i ka treguar disa foto Bamit ku shfaqej me deputetin Frroku, pasi kishte deklaruar se nuk e njihte dhe i arrestuari ka thënë më pas se e njihte vetëm si fytyrë, por jo si emër. Kjo ka rënduar pozitat juridike të të dyve.

Por një tjetër fakt që renditet në raport, është përgjimi në dhomën e Prokurorisë së Krimeve të Rënda gjatë ballafaqimit sy më sy, pa prezencë të prokurorëve, të Tom Doshit dhe Durim Bamit. Pa ditur se dhoma kishte përgjues, ata kanë biseduar.

"Ti e di që unë nuk kam lidhje në këtë ngjarje. Këtë e dimë unë, ti dhe ai", ka thënë Bami ndër të tjera, një detaj që provon se personi i tretë është pikërisht Mark Frroku.

Ky detaj përmendet në raportin e dërguar edhe në Kuvend. Bami është shprehur gjithashtu se: "Doshi më kërkoi që të gënjeja. Ministri Tahiri më kërkoi të bëja deponimin, por nuk e bëra se e dija që ishte gënjeshtër".