Voal-online Në një raport të komisionerit të Këshillit të Evropës për të Drejtat e Njeriut, Tomas Hamarberg, i cili vizitoi Serbinë në fund të vitit të shkuar, thuhet se Serbia i shkel të drejtat e njeriut. Hamarberg raporton se shqiptarët që jetojnë në jug të Serbisë në komunën e Preshevës, Medvegjës e Bujanocit, e ndjejnë se rajonet e tyre janë jo të zhvilluara ekonomikisht, në shpërpjesëtim me rajonet e tjera të Serbisë. Në raport thuhet se ligji për mbrojtjen e të drejtave dhe lirive të minoriteteve kërkon krijimin e këshillave nacionale për minoritetet. 16 këshilla të tillë janë krijuar që përfaqësojnë shumicën e minoriteteve në Serbi dhe kanë qëllim të mbrojnë autonominë e minoritetit të tyre në fushën e kulturës, arsimit, gjuhës etj. Një këshill i tillë për minoritetin shqiptar që jeton në jug të Serbisë nuk është krijuar ende. Tomas Hamarberg jep një sërë rekomandimesh për përmirësimin e të drejtave të njeriut në Serbi, veçanërisht përmirësimin e mardhënieve mes grupimeve etnike si shqiptare, serbe e rome në Luginën e Preshevës.
Këshilli i Evropës thotë se Serbia ka përmirësuar ligjin dhe institucionet për të mbrojtur të drejtat e njeriut, por zbatimi i tyre është i dobët. Korrupsioni, dhe inefektiviteti i parlamentit bëjnë që qytetarët të humbasin besimin tek shteti. Serbia nuk ka një ligj antidiskrimim që do të mbronte në radhë të parë të drejtat e popullsisë më të neglizhuar, asaj rome, thuhet në raport.